قولتلك بحبك

انا حلمت بماما
اام
مش اوى يعنى
حلمت انى كلمت ماما
حلمت انها كانت بعيدة اوى اوى و مش عارفة حتى اكلمها
و انى ليوم واحد بس كنت هشوفها
بس للأسف انا كنت فى مشوار بعيد زى بتاع النهاردة
و كل شوية اكلمها فى التليفون بسبب و بدون سبب
و هى بتتكلم اقولها بس استنى بس استنى بس اسمعى المهم
تقولى فى ايه
اقولها انا بحبك اوى يا ماما
تضحك زى ما كانت بتعمل و تقولى بس
اضحك و اقولها انا بحبك بجد
كل عشر دقائق اعمل فيها الحركة دى لغاية مازهقت
و كنت مشتاقة اوى انى اروح اشوفها
بس صحيت
وحشتينى يا ماما

هعملك كل حاجة

على قد ما انا بندم على حاجات كتير حصلت و محصلتش مع ماما
لكن اللى على طول فى بالى الان
حاجتين
الاول انى معملتلهاش كباية نسكافيه بوش زى اللى كنت بعملها
الثانى انى مروحتش محل الادوات المنزلية اللى فى شارع مصدق (tulipe)
اللى مكنتش عارفة ساعتها انه هو المحل ده اللى هلاقى فيه الحاجات اللى عاوزاها
و اللى مش معايا فلوس الان اشتريها

انا مش بندم انى مستغلتش فرصة الشراء

انا بندم انى مستغلتش فرصة انى افرح ماما انها تجيبلى حاجة فى جهازى
جابتلى قبل ما تموت مساكة اللى بنستخدمها فى القلى
قالت دى واحدة للبيت و دى واحدة ليكى
و جابتلى مرة صينية تقديم

و كانت فرحانة بيهم جدا

ندمانة انها ياما اتحايلت عليا اروح معاها الدقى و تقولى تعالى معايا و انا اروديكى المحل اللى هناك تتفرجى و شوفى ايه اللى يعجبك

كانت من الزهق تركب لغاية محطة البحوث  و بعدين تتمشى لوحدها لغاية الدقى
مع انها مالهاش خروج من البيبت اصلا
الدكتور كان بيستغرب هيا عايشة ازاى من اساسه

بس كانت تقول انا بتمشى اشترى دنش من الفررن اللى هناك و فضل امشى و اكله لغاية الدقى
بدل ما هو محدش فيكم عاوز يمشى معايا

الان
انا نفسى فى يوم اخرج فيه مع ماما
و مش هتحرج منك فى الشارع
اعملى اللى تعمليه
زعقى و كلى و اعملى كل حاجة الابناء بيتحرجوا فيها من اهاليهم
بس تعالى يوم واحد بس
واحد بس
انا هرضى

هابى زفت و اطران فالنتين داى

بمناسبة ان الكل بيتكلم عن الفلانتين ، بعد ما عرفت عبدالرحمن ب كام شهر كان مسافر مصيف و قالى "انا جبتلك هدية و مرات اخويا جبتلك هدية "، و مش عاوز يقولى هى ايه ، اول ما شوفته ، لقيته ماسك شنطة هدايا كبيرة و هو جاااااى من بعيد ، قلبى وقع فى رجلى ، و قعدت اقول لنفسى ، ايه ده دبدوب ، دبدوب ، لا ، مش مصدقة ، دبدوب ، لا مش مصدقة ، اول ما جه بقوله ازيك ايه الشنطة دى ، قالى دى الهدية ، و لقيته بيطلع دبدوب بمبى ، قلبى المرة دى اتفعص فى رجلى بعد ما كان وقع ،أخد خطوتين لورا، و بيقولى دى هدية ...مالك رجعتى ورا ليه؟؟ ، وقفته و بقوله "استنى بس عشان نبقى على وضوح من الاول ، انت اللى جايب الهدية دى؟؟؟ "، قالى "لالالالالالالا طبعا انا مش بتاع دباديب و لو فى مرة قولتيلى هتيلى دبدوب هسيبك فيها ، انتى مخضوضة ليه ؟ اتخضى انا ماليش فى الجو الفقيع ده"، رجعت الخطوتين اللى رجعتهم لقدام تانى و قولتله ،" انا لو عرفت انك اللى جبت الدبدوب ده كنت سبتك الان ، ايه شغل العيال ده ". ضحك و قالى "لا ده جابته مرات اخويا ، قعدت اقولها فاطمة مابتحبش الحاجات دى قالتلى انت عرفت من نين ، كل البنات بتحب الحاجات دى ، انا بس كنت بطلع الدبدوب عشان اجيبلك هديتى من اخر الشنطة ، سلسلة "، و من ساعتها ، 6 سنين عدوا ، و الدبدوب لسه فى الشنطة . الحمد لله لنك ماجبتليش دبدوب ، كان زماننا ذكرى .

never give up

Hani El-Masri

My Dad always told me: "If you don't have what you love, you should love what you have !
I was never convinced.
I say: "If you don't have what you love, keep fighting for it. Never give up. Until you get it or die trying…!"

الوصايا العشر الحقيقية

الوصايا العشر.
(اللي بجد يعني..)
واحد: احترم الناس اكتر ما بتحترم نفسك .. (و بعدين تبقي تحترم نفسك زي ما بتحترم الناس…)
اتنين: اللي يستاهل انك تعمله.. اعمله كويس… (و في وقته.)
تلاته: خليك في حالك.. و ما لكش دعوة بكلام الناس… (و الادب فضلوه عن العلم.)
اربعة: اللي يلعب الدح.. ما يقولش أح.. (مش عاوزين زن و شكوي طول الوقت..)
خمسة: عندك كلمة حلوه .. قولها… ما عندكش.. نقطنا بسكاتك..!
ســـــته: ما تحشرش مناخيرك في اللي ما لكش فيه..( و احترم التزاماتك .)
سبعه: دور علي المعلومات من مصادرها.. (و ما تجيش في الهايفة و تتصدر ..)
تمانيه: العقل زينه.. و مش معمول عشان يتحط في التلاجة.. استعمله من فضلك..!
تسعة: ركز .. و اعمل حاجة واحدة.. و اقطع فرطها ..( و اتحمل مسؤولية اعمالك.)
عشرة: الساعة و المنبه اخترعوهم من زمان.. و مش اكسسوارات كمالية .. حافظ علي مواعيدك..

بس اياك يحوق !

المصدر : Hani El-Masri

كوميديا فرحى

كتب كتابى كان المفروض يكون فى جامع و بعدين الاهل المقربين و الصحاب ييجوا معانا بعدها على قاعة نقعد فيها قاعدة عائلية و ناكل و نتكلم و تبقى فعلا المناسبة صله رحم

اللى حصل غير كده خااااااااااااااالص

ميعاد القاعة كان بعد الجامع ب اربع ساعات
فلغينا الجامع 

و الاتفاق مع بابا اننا مش عاوزين فرح
هو قاعدة و خلاص
ممكن نشغل موسيقى بصوت واطى و بس
و بس
و بس يا بابا

قبل الفرح بيوم و انا مشغولة على الاخر

بابا بيكلمنى فى التليفون حوالى عشر مرات
كل مرة يسأل على حاجة و هو قاعد مع مدير القاعة

عاوزة DJ                  لا يا بابا قلنا موسيقى بس و لو شغل اغانى رقص او على الصوت هقوم بنفسى ازعق له
عاوزة كوشة ايه          كوشة ايه يا بابا ، انا مش بتفرق معايا اى حاجة
انا حجزت زينة السلم و المدخل بتاع النادى
عاوزة تورتة تورتة
ايييييييييييييييه يا بابا تورتة ايه و شغل امسك السكينة و نقطع سوا  الغيها حرام عليك الفلوس الطايرة فى الهوا دى انا اولى بيها

و كان فى نفس الوقت بيكلم عبدالرحمن يقوله هو عمل ايه و عبدالرحمن بعدها يكلمنى

ايه يا فاطمة بابا عامل حاجات كتير اوى احنا مش قلنا بلاش فلوس على الفاضى حرام يا بنتى فلوس شغل ابوكى دى تضيع على الفاضى
و الله بقوله مش عاوز يسمع الكلام
ده بيقولى انه حجز تورتة و زفة ، بقوله على ايه ده كله انا و فاطمة مش بنحب الزفة و بنتعب منها جدا 
قالى لا خليها تفرح البنات بتحب الحاجت دى

ايييييييييييييييييييييه تورتة ايه و زفة ايه

كلمت بابا و يادوبك لحقته و هو ماشى من النادى

ايه يا بابا تورتة ايه و زفة ايه
دى زفة البرق ( تقريبا) حلوة يا بنتى
حلوة ايه يا بابا انا مبكرهش فى الافراح قد الزفة فلعيًا بتتعبنى الغيها
(متعصب) الغيها ايه يابنتى ماينفعش                        ليه
هو كده ماينفعش عروسة من غير زفهة
انا بتضايق من كلمه هو كده دى، ليه يعنى! مالهاش لازمة
 ( بيزعق) يابنتى ماينفعش انتى اول مرة تتجوزى لازم زفة للعروسة بطلى هبل بقى
يا بابا بتعب و الله منها صدرى بيوجعنى اوى بلاش و النبى
بقولك ايه ماتدوشنيش انا خلاص حجزتها انتم بقى ماتبقوش تمشوا فيها تبقوا ادخلوا على طول انتم حرين لكن لازم يكون فى زفة

طبعا بابا كان متعصب جدا جدا 
و انا ابتديت افقد الامل فى اليوم و احاول اقنع نفسى
ده جوازك،و فرحهم هم ، جوازك، فرحهم هم ، انتى عليكى تتجوزى و يتنيلوا هم بالفرح و يفرحوا بيه

تانى يوم
اكتشفنا ان القاعة الساعة 7.30 مش 6.30
و فى ناااااااااااااااااس كتير جت و مشيت منهم دكاترة لينا فى الجامعة عشان القاعة مقفولة
و لما عاتبنا بابا زعق فينا و قال هو ايه ماينفعش العرسان يروحوا قبل المعازيم

و دخلنا فى سلسلة مكالمات على التليفون مع الناس اللى جم و مشوا و اللى هايمشوا و عبدالرحمن بيحاول يخلي صحابه اللى وصلوا يمسكوا فيهم

و العربية باظت و قعدوا يصلحوا فيها ساعة
و الاستاذة اللى هو اختى بدأت تخيط زراير الجاكت بتاعها بعد ما انا لبست و خلصت و عبدالرحمن كان جه بعد ساعة و نص تأخير عشان العربية
و قال ايه لازم تيجى معايا المصوراتى
و الله ضيعت عليا اليوم لانى مكنتش مرتاحة فى وجودها و معرفش اخد راحتى فى الصور

و روحنا متأخر جدا جدا
و بابا دفع حق ساعة زيادة للزفة عشان التأخير اللى هو عامله بسبب حسنى و انتظارنا ليها

و روحنا

 الزفة كانت مسخرة ، احنا اخدنا الرصيف و نص سلالم النادى جرى فى اقل من دقيقة لدرجة اننا كنا بنمشى من جوه الزفة عشان نمشي و الزفة بقت ورانا مش قدامنا
المصوراتى بيزعق لنا اننا ماشيين بسرعة و وقف الزفة على السلم عشان يزعقلنا 
و احنا من النور اللى ضارب فى عينا مش شايفين حاجة ولا شايفينه و هو بيشاور لنا نمشى ولا نقف
هو اول ما يقولنا امشى ناخد السلم جرى لغاية اخره ، يزعق و يطفى الكاميرا وييجى عندنا يقولنا بشويش ايه اللى بتعملوه ده
و احنا نضحك
، و نص فقرات الزفة لغيناها ، كل ما ييجى حد نقوله لا ، بتاع البخور قولناله لا ، 
و قال ايه فى واحد لابس حصان عاوز يلعب معانا و نتصور جنبه و قال ايه اركب على ظهره و اتصور معاه ، من كتر ما احنا رجعنا لورا كل ما يقرب نقوله لا ، و هو تقريبا مش شايفنا اصلا و باصص علي الارض، واحد من الزفة راح شال الحصان من وشه و قاله يا عم امشى بقى العرسان دى غريبة مش عاوزين،
و احنا عمالين نضحك
و كانوا عاوزين يغنوا لكل واحد لوحده 
انا اطلع قدام و هم يغنولى و ارقص و بعدين عبدالرحمن
الناس عمالين يشاوروا و احنا مش فاهمين
جه المصور بيقولنا كده
كشرنا فى وشه احنا الاتنين و قولناله فى نفس الوقت: لا طبعا
راح موقف غنا الزفة و قالهم عدوا الفقرة دى، بعصبية

 و المصوراتى سابنا فى نص الزفة بعد ما زهق مننا اننا بنمشى بسرعة و مش عاوزين نعمل الحاجات اللى بيقولنا عليها
و ساب الكاميرا للصبى بتاعه


اول ما دخلنا القاعة الصوت كان عالي جدا
كل ما حد يسلم علينا نقوله قول لل DJ يوطى الصوت
لغاية ما اخواتى الاتنين هم وصحابهم كلهم راحوا يتخانقوا معاه يوطى الصوت وهو يقول لا انا بشتغل كده
و الخناقة كبرت و راحوله صحاب عبدالرحمن
و الراجل بيقول ازاى يعنى اوطى الصوت
و مقتنعش اننا عاوزين كده لانه خايف بابا يشتكى عليه
و يقول انا الاتفاق معايا انى اشغل اغانى عادية مافيهاش رقص
و مقتنعش الا لما عبدالرحمن بنفسه و بابا راحوا له

و احنا بنكتب الكتاب
كانت الترابيزة جنبه
اول ما روحت اقعد شاورت له و كشرت و زعقت
احنا قولنا الصوت يكون واطى جدا احنا فعلا دوخنا و مش سامعين ولا شايفين قدامنا من الصداع وطى الصوت 
الراجل راح راجع و طفى الصوت اصلا و قال ايه الفرح ده طب اهو
و مشغلوش تانى الا بصوت واطى بعد كتب الكتاب

كان يوم مسخره


انا صُعقت لما الراجل جاب الشربات و عاوزنا نشرب بعض ، قولت لا لا لا لا ، و عبدالرحمن قالى خلاص بقى خلي الليلة تعدى الناس بتحب كده ، كنت هدلقها عليه و قلت لا انا مش هعمل الحاجات دى 

و المعازيم يقولولى لازم 
و انا ازعق هو ايه اللى لازم، ايه اللى لازمه

و فى اخر الفرح المعازيم جم يقولولى احنا هنقول للراجل يشغل اغانى شعبى عشان العيال عاوزين يرقصوا و نفرح كده
و انا اقول لا
و لما لقيتهم هيرحوله فعلا
 قومت و نزلت من الكوشة و مسكت فيهم و زعقت انا قلت لا
مافيش اغانى شعبى في فرحي
شعبى ايه  انتم بتهزروا
لا يعنى لا




الخلاصة
هو كان يوم مختلف عن اى فرح تانى ممكن تشوفه
و حصل فيه حاجات كتير مكنتش عاوزاها

بس احسن حاجة حصلت هى كل الحاجات اللى محصلتش فيه

انا بفتخر انى معملتش زى بقيت الافراح 
الحمد لله

مش عاوزة انام

لما ببقى فى مشكلة او متغانقة مع حد
بدخل اناااااااااااااااااااااااااام
و بصحى بالعافية
لكن لما ببقى غضبانة
ببقى مش عاوزة انام
انا اللى بتحايل على النوم
لما ببقى غضبانة و زعلانة من حد
ببقى عاوزة اسهر للصبح
معرفش ليه!!!

تجهيز المطبخ

انا فرحانة اوى اوى اوى
روحت tulipe  و لقيت فيه الحلل السيراميك الكورى  neoflame
احسن حلل على الاطلاق
1 -اولا و و الاهم هو انها خالية من سموم المعادن دى cadmium and lead و سموم اخرى
2- انها سيراميك عالى الجودة و مش بتلزق نهائيا
3- بتدخل الفرن و التلاجة
4- كل مميزات الشكل فيها حلوة و الغطاء محكم بيسرب جزء من البخار من الماسكة بتاعته و تجنن من الاخر
و لقيت فيه السكاكين الاستانليس ستيل اخييييييييييييييرا
مش هقول عليها غالية لانها كويسة و اللى بره زبالة الصراحة يعنى مافيش مقارنة
و لقيت محل فى شارع ميشيل باخوم (النور سابقا) فيه حاجات حلوة برده و علب تلاجة حلوة و سعرها حلو


الصراحة
انا كل ما افكر فى موضوع الجهاز
اتضايق اوى اوى اوى
ااه الحاجات اللى كنت عاوزاها زمان غير دلوقتى
بس لو كان معايا و لو 200 جنيه كل شهر
كنت هجيب كل اللى نفسى فيه
انا مش هجيب حاجات مش هستخدمها
انا مش طماعة و الله
و المصيبة ان بابا عارف ده كويس
لكن الجهاز خراب بيوت
و انت اللى قلتلى اكتر من مرة
انا مدفعش فلوس فى كراتين متكومة بالسنين
انا تاجر
الفلوس فى الشغل تجيب فلوس
و ساعة الجواز هدفع تمن الحاجة الغالى مش لازم نشترى فى الخصومات و تتركن جنبنا
نشغل الفلوس احسن تجيب اضعاف تمن الحاجة
و ساعة الجواز ندفع عادى
الفلوس جابت نفسها اصلا

انت حر

انت اللى قلت
انا ياما زنيت عليك
و اقنعتنى
انت عندك حق انا مقلتش حاجة
بس احنا حاليا مش مرفهين لدرجة اننا ندفع الالاف دى كلها مرة واحدة
انا عن نفسى
هجيب اللى عاوزاه

انا فرحانة انى اخيرا عرفت هجيب حاجاتى من نين
بس انا زعلانة انى مش واثقة انى هجيبها
لو ماما كانت موجودة كانت هتجيبلى كل حاجة انا عاوزاها
الله يرحمك يا ماما ، محدش عرف قيمتك الا لما مُتى

يا رب ارزق بابا برزق اولاده يا رب

كل ما عبدالرحمن يكلمنى
اول ما اقفل السماعة
اقعد اتنطط و اضحك
حبيبي
وحشتنى اوى

الدنيا حلوة

ياااااه. الدنيا بتحلو اوى بعد ما عبدالرحمن يكلمنى.

يااااه
الحياة من غير زبدة صعبة اوى

عندى عادة غريبة جدا
لما الاقى سمسم على الترابيزة مثلا وقع من عيش
امسك السمسماية ب السبابة و اقسمها نصفين بظهر الابهام
و مارميهاش الا لما اقسمها نصين

معرفش ليه!!!!!