يمكن من فرحتي به و بالهدية
يوم الثلاثاء اللي فات كان عيد ميلادي
لبست طقم حلو و عملت لتفسي كيك و كلت نص فرخة بحالها :)
و انا قلتله يحاول ييجي قالي مشغول و مش هيقدر
و انا باكل كلمته اسأله جاي ولا لأ لاني هاكل ورك الفرخة
بستعبط بسلامتي
بس قلت يمكن لما اكلمه قلبه يحن و يقولي خلاص هاجي
قالي لا
متأكد؟؟
لا يا فاطمة مشغول جدا و هروح اكمل شغل
زعلت شوية بس قلت لا اتبسطي و ماتخليش حاجة تزعلك النهاردة
بعدين قعدت علي كمبيوتر حسن اتفرج علي فيلم و انا لسه في اول عشر دقائق محمد جاله مكالمة و طلع بره
بعدين دخل قالي قومي انا عاوز اذاكر شوية و عاوز اقعد لوحدي
عادي محمد بيقول كده علي طول خاصة ان قبل ما ادخل اتفرج علي فيلم قالي كمان شوية يعني كان مشغول
اوك
قلت له اجي امتي ؟
قالي لا اقفلي الفيلم بقي انا عاوز اقعد لوحدي
اتضايقت شوية و ماشية في الطرقة بقول اعمل ايه الان اعمل ايه الان
و طالعة الصالة و بخ لقيت عبدالرحمن واقف في الصالة بيضحكلي
انا اتخضيت فعلا جدا
مكنتش متوقعة انه يبجي خالص
عيطت من كتر الفرحة و كنت سعيدة جدا
بعدين اداني شنطة حلوة كده فيها هدية ملفوفة كويس جدا
بفتح لقيت صندوق خشب انتيك تحفةةةةة
طالع من ايد فنان عبقري
بالضبط اللي كنت نفسي فيه
ضحكت و عيطت و حضنت حبيبي و كنت سعيدة جدا
و بعد ما خلصت عياط للمرة التانية لقيته بيديني هدية تانية
Note book بورق اصفر عتيق ملفوق بجلد
حاجة بردة انتيك تحفة
و كمان كاتب لي رباعية تحفةةةة
حسيت اني قلبي هيتخلع من مكانة
احسن هدية جاتلي في حياتي
شكل عيد ميلادي ال ٢٥ اللي كنت خايفة يكون يوم كئيب خاصة اني معرفتش اعمل اي حاجة من اللي كنت عاوزة اعملها
اتحول ليوم سعيد مديني طاقة سعادة و حب لغاية الان
عبدالرحمن احسن زوج في الدنيا كلها
ربنا يخليه ليا و اقدر اسعده دائما
انا بحب الراجل ده اوي اوي اوي
با رب نعيش سوا في سعادة و نموت في يوم واحد
انا مقدرش اعيش يوم من غيره
ليست هناك تعليقات:
إرسال تعليق