علي قد ما تأخر جوازي مدعج جدا علي قد ما انا بأحمد ربنا في بعض الاحيان
الواقع واضح محدش فاضي يقف مع العمال في الشقة
علي الرغم ان في حاجات تعصب
يعني اخو عبدالرحمن تعبان جدااااا و مشغول في شغله بسكل غير مصدق و انا مقدرش ابدا اقوله انزل اشتغل في الشقة في الكام ساعة اللي بينام فيهم كل اربع خمس ايام
حرام
في كهربائي تاني موثوق فيه ثقة عمياء يتساب له المفتاح و هو خير من يعمل الشغل
نستني ليه لما نقول لاخو عبدالرحمن اللي مش لاقينه !!
و السباكة نفس الكلام ابو واحد صاحبنا برده شفنا شغله و ثقة
و هكذا
بس علي الرغم من تأخر الموضوع لفقط عدم وجود حد يباشر الشغل
الا ان الشقة لو كانت خلصت انا كنت هحتاااااس
بابا مش معاه مليم
لاول مرة في حيااااااتي كلها مكنش معايا فلوس "للأكل"
اكل عادي لا فانتازيا ولا حاجة
خضار بس
مافيش
و بقالنا شهوووور بنبيع في المحل
لو خلصت الشقة برده مش هنتجوز
و اللي يقولي ياستي اتجوزي باي حاجة
هقوله هتجوز من غير تلاجة او بوتاجاز !!
انا اللي هجيب كل الادوات الكهربائية هتجوز من غيرها ازاي مثلا
ده غير الفرش ، المرتبة و الملايات و ادوات المطبخ
هتجوز من غير اساسيات بحتة ازاي!!
كل ما احس اني اتخنقت افتكر كلمة بنت عمتي
"ممكن يكون ربنا مأخر الموضوع من طرف عبدالرحمن و الشقة و همها لانه عامل حساب ان باباكي مش قادر يجهزك فاصبري هتلاقيها اتحلت مرة واحدة من الطرفين لما ييجي الوقت المناسب"
ساعتها بهدي
و ادعي و اقول يا رب افرجها من عندك
لكن انا و عبدالرحمن متضايقين جدا
مش عشان كل اللي حوالينا اتجوزوا و خلفوا ، ده لا يعنينا في شئ
لكن احنا طولنا اوي
محتاجين بعض
بكل المعاني
محتاجة تشجيع عبدالرحمن محتاجة حضنه
محتاجة استقبله لما يرجع من الشغل بحضن كبير و بوسة في خده
و اشوف ابتسامته بعد هم الشغل و الطريق تظهر
محتاجة اخد بالي منه
احضر له اكل و اكل معاه
نتكلم و نضحك و نشكي
محتاجه اشوفه كل يوم
و كفاية مكالمات تليفون بقي
ايه ده
سبع سنين تليفون ، كفاية
كل علاقة ليها مراحل تطور
احنا طورنا كل المراحل في التليفون
بنتكلم الان كأننا ناس متجوزة بقالها خمس سنين
محتاجين بعض
يا رب قرب البعيد
