قلبى اتخلع

حسن تعب اوى النهاردة
عنده اسهال شديد موته
و رجع فى الاخر
خلع قلبى و هو داخل عليا الاوضة بيمد ايده و يادوبك بلمسها لقيته وقع على الارض
معرفتش اعمل ايه لثانيتين
قولت اقيس الضغط
لقيته بيقولى عنده تلبك معوى
عملته مشروبات و اديتله برشام
و وقفت فى المطبخ اعيط
لما امشى هيعمل ايه
كل مرة يحصل له الحكاية دى بيجيلى
لو كنت نايمة
يدخلى الاوضة و يترمى جنبى على الارض
حتى لما كانت ماما عايشة
كان بيجيلى انا
و لو حسنى صاحية يقولها صحى فاطمة
وجع قلبى و هو بيرجع
دخل الحمام لقيته مش قادر يقف
حسن نرفوز اوى
كنت عاوزة امسكه ليقع
قالى بصوت طالع بالعافية امسكى ايدى انا مش قادر
دموعى نزلت و انا ماسكاه و بطبطب على ظهره
قعدت ادعى ربنا فى سرى يخفف عنه و يشفيه
و عمال يقولى خلاص كده
قولت له انت رجعت كتير كده خلاص تنام شوية و خلاص

المضحك
بالرغم من تعبه الا ان كل ما اجيبله البرشام او مشروب او ليمون يقولى ايه بقى القرف ده انا مش قادر
الحاجات دى مالهاش لازمة
و يقعد يسأل ده بيعمل ايه
حتى و انت تعبان يا شيخ
ضحكتنى و انا قلقانة عليك

لما امشى هتعمل ايه
هتروح لمين يساعدك
محمج هيقف يتفرج
و حسنى على ما تصحى من النوم و تفهم فى ايه ممكن تاخد لها ساعتين و زيادة هتكون انت مت ساعتها
انا الوحيدة اللى بجرى عليك
و انت عارف ده و عشان كده بتجيلى
هتعمل ايه لما امشى
قلبى واجعنى
مين هياخد باله منك
و انا عارفة و متأكدة ان حسنى مش قد خدمة البيت و انها تاخد باله من حد عيان
انا متضايقة اوى
هسيبك ازاى
ده انت ابنى قبل ما تكون اخويا
قلبى واجعنى اوى
يا رب
 

انت ربى

كيف يحزن!

من عنده رب

يقدر و يغفر

يستر و يرزق

يرى و يسمع

و بيده مقاليد الامر

هيبرة وجودك

معرفش ليه لما عبدالرحمن بيجى البيت ببقى مهيبرة اوى
بتصرف تصرفات عجيبة
يمكن من كتر الفرحة
نبرة صوتى بتبقى غريبة و طريقتى فى الكلام

المصيبة لما بابا بيرجع من الشغل
ببقى شخصية عجييييييييييييييبة لما بيتجمعوا هم الاتنين سوا
بهزر هزار سخيييييييف و عجييييييييييب و بقول كلام مايتقالش
و لما احب اصلح جملة قلتها بنيلها اكتر
ببقى متوترة اوى

عجيبة

الحنين

مؤخرا بعد ما اصبحت زهقانة من كل حاجة
و بعد ما قررت احاول اطنش و ماتعبش نفسى بالحزن و الغضب على اشياء مش هعرف اغيرها

بقيت بحن لكل حاجة قديمة بحبها و عارفة شعورها و احساسها و متوقعة اللى فيها

يعنى بقيت بحمل المسلسلات اللى اتفرجت عليها اونلاين و اتفرج عليها تانى
لا لشئ اكثر من انها فعلا مسلسلات حلوة و معمولة كويس و انا عارفة قصتها
عارفة اللى فيها و متوقعاه فمش هيخب املى لما حد يموت فيها مثلا
ده غير ان المسلسلات بتعيشنى واقع مختلف عن واقعى
و انا بتبسط بيها اوى و بفرح لما اتابع طريقة التصوير و الاخراج و اطلع الغلطات

بقيت عاوزة اكل كل الحاجات اللى كنت بأكلها زمان و بطلت عشان الرجيم او عشان شرائها محتاج نزول و اجيبها بنفسى
بقيبت عاوزة اكل بابا غنوج و بصارة و طعمية من عند الشبراوى
فطير مشلتت بجبنة قريش و عسل
نفسى فى كيك من اللى كنت بعملها  ااااه كانت حلوة اوى

ده انا حتى عاوزة اعمل شنط من نفس ذات الباترون اللى عملته قبل كده عشان عارفة هى هتطلع ازاى

من الاخر

مش عاوزة يخيب املى تانى فى اى شئ
بالاخص اصغر الاشياء
عاوزة المعتاد و المعروف و اللى بيرجعنى لذكريات نفس الوقت اللى جربته فيه اول مرة و اللى كنت فيه سعيدة


على فكرة انا بحب صوت الشيخ مشارى راشد
و بحب اسمع سورة البقرة
لكن الان كل ما اسمعها منه
بيجيلى احساس عميق جدا بان ماما ماتت
لاننا كنا بنشغلها طوال اليوم و الليل بعد ما ماما ماتت
فارتبط صوته و السورة ارتباط شرطى بحزنى و ادراكى ان ماما ماتت الان

عاوزة افرح
و هفرح
و طز فى الكل
و معلش يا رجيم استنى عليا اسبوعين كده اكل اللى نفسى فيه و ارجعلك تانى

انا سعيدة

سعيدة
بسببك
حبيب عمرى
بحبك

عشان هنفضل كده

بم اننا هنفضل كده
احنا كشعب و كعائلة
و انا مهما اتنططت مش هعرف اعمل اكتر من اللى عملته هنا فى البيت و مع بابا و اخواتى
فإذن
طز
انا قررت اكون سعيدة تانى
و مش هخحط فى دماغى تانى وساخة حسنى و مشاكل البيت و التعامل و قرف الشارع و الشعب و المصاريف و الجهاز و الفلوس
انا خلاص غيرت فكرة استعبادهم ليا
و رجعت اخد مصروف
و مش هعرف اخد فلوس للجهاز الا فى اللحظات الاخيرة
و بالفعل درست السوق و دورت و لقيت هجيب ايه من نين
فخلاص بقى
عصبيتى عمالة تطلع على جسمى
و عبدالرحمن محتاجنى يرمى حموله عليا
و انا بالمنظر ده انا اللى بزود همومه
هركز فى شغلى
و هنزل المصنع اول ما ننقل و هتفحت شغل
و طز فى الباقى
لن اتعصب من شئ لا استطيع تغيره
و ادعم جوزى و ادعيله
ادعى و بس
يا رب
اشرح صدورنا

I hear your voice - Korean Drama

I hear your voice

مسلسل رائع فعلا فيه كمية من القيم و القواعد الحياتية اللى لا يمكن الاستغناء عنها
هركز اكتر عن القيم و القواعد دى اكتر من تقييم المسلسل نفسه ، لانه مش محتاج تقييم هو فعلا ممتاز

القصة تدور حول قضية قتل اب البطل ، الشاهدة الوحيدة اللى انقذت القضية هى البطلة ، و شهادتها تسببت فى باقى المسلسل كله
القصة باختصار حول الانتقام ، و ده اهم موضوع فى المسلسل، المسلسل يرسخ لفكرة عدم جدوى الانتقام .
القاتل كان بينتقم من اب البطل لانه تحايل و اخد قلب كان المفروض يتزرع لزوجة القاتل و بدل ده اخده لزوجته هو، فزوجة القاتل ماتت، لغاية الان هو ضحية، بس بمجرد ما قتل اب البطل اختفت كل اسباب القاتل من ظلم و موت و غضب و تحول لقاتل، و انا شخصيا مع الفكرة دى من زمان
ان الانتقام حول طريقة بطريقة للحزن ، الانتقام لا يجدى شئ على الاطلاق، الانتقام يحولك لوحش مثل الظالم ، تختفى كل اسبابك و تصبح مثله بالضبط، لا فرق بينكما تماما.
القال طلع من السجن عازم على مواصلة مشوار الانتقام مرة تانية بانه يقتل الشاهدة اللى دخلته السجن و بسبب ده امه المسنة و ابنه الطفل ماتوا من الجوع، فاعتبر برده ان هى بشاهدتاه قتلتهم ، و مرة تانية تحول من ضحية لوحش.

القاتل حذر البنت انها تشهد عليه ، و هددها انه هيقتلها و هيقتل اهلها لو اتكلمت
البنت فعلا مكانتش هتشهد لولا حبكة درامية اخرها، فى المحكمة انقض عليها و خنقها و قالها الموضوع مخلصش انا لما هطلع هقتلك و هقتل كل واحد سمع كلامك، الطفل الصغير ده هو البطل وقت موت ابوه ، قالها ماتخافيش انا هحميكى

الوعد
وعد استمر عشر سنين ، الولد حافظ عليه و فضل يدور عشر سنين عليها و هى ناسياه اصلا، و لقاها بالمصادفة فى نفس وقت خروج القاتل من السجن، و بدأ مشوار الانتقام مرة تانية، القاتل عاوز يقتل البنت مش هامه الولد ، و الولد عاوز يحميها حتى لو خسر حياته، لانها من عشر سنين ظهرت فى مسرح الجريمة بالضبط قبل ما القاتل يقتله بعد ما قتل ابوه، فهى انقذت حياته بظهورها و انقذت القضية بشاهدتها، فالدين كان كبير ، هو مكنش عنده مانع انه يموت فى سبيل حمايتها، بس الاهم فى الموضوع هو التالى:
(اللحظة التى ستقتله فيها ستختفى كل اسبابك و تصبح وحش قاتله مثله لا فرق بينكما)
انتقامك مش هو العدل، مش هو الحل، القاتل عاش عشر سنين فى غضب و تخطيط و تدبير لانتقامه، دى مش حياة، ده عذاب اشد من عذاب و غضب خسارتك و الظلم اللى وقع عليك.

بعد فشله انه يقتلها او يخلى البطل يقتله و يبقى زيه ، قتل امها ، اخر مكالمة بين الام و البنت ، الام قالتلها احسن كلام ممكن يتقال فى نهاية العمر على الاطلاق، هى كانت متكتفة و عارفة انها ميتة ميتة ، الوصية الاخيرة كانت كالأتى، (العين بالعين و السن بالسن، لو مشينا على القانون ده كل الناس هتكون معاقة،  اللى بيكرهوكى و عاوزين يأذوكى دول ناس بؤساء، عاشوا حياتهم فى غضب الانتقام ، ماتبقيش زيهم ، دول ناس تشفقى عليهم، انت ليكى حياة واحدة تعيشيها ماتضيعهاش فى غضب الانتقام من شخص غيران منك، و عاوز يشدك لتحت و تصبحى وحش زيه)
 واو
انا معجبة جدا بالمقولة دى
و أويدها 100% ، انا اسعى للانتقام فقط فى دائرة القانون المعاقة و اللى مش هتجيبلى حقى، بس هعمل اللى عليا، لو القانون ماجبليش حقى هسيبه لربنا، ربنا يوم القيامة هيعرف يجيبلى حقى بالضبط لا ناقص ولا زائد.
و طبعا فى فرق كبير جدا بين الحق و الانتقام
الحق ان حد اخد منك حاجة و انت عاوز ترجعها
لكن الانتقام ان حد اخد منك حاجة لا تسترد و انت عاوز ترد له نفس الفعل
مثل بسيط ، لو حد اخد منك ترقيتك او تعينك حاول تستعيده بالقانون او غير القانون بعد فشل القانون
لكن لو حد قتل ابوك ماتروحش تقتله او تقتل ابوه او اخوه
لان ابنه او اخوه هيجى يقتلك لو عرف او يقتل مراتك او اختك
و اخوك من بعدك هيروح يقتل ابنه
و هكذا ، و هندور فى دوامة الثائر
بمجرد ما هترفع السكينة فانت اصبحت مثله

الحب
الحب اللى فى المسلسل سامى جدا، الطفل حب البنت عشر سنوات من وقت القضية و فضل يدور عليها عشان يوفى بوعده و عشان حبه فى نفس الوقت
و فى النص حصلت شوية حاجات خلته بقفد الذاكرة لفترة ، و لما قابلها تانى حبها تانى حتى و هو مايعرفهاش ولا يعرف نفسه اصلا
عاجبنى اوى فكرة الحب الصعب ده ، البنت اكبر منه بسنين كتيرة اوى، ساعة القضية هى كانت فى الثانوى و هو كان عنده 8 سنين، و طبعا مجتمعياً علاقتهم مستحيلة، و فى كورسيا زى عندنا برده ، عيب واحدة تتجوز واحد صغير متعرفش ليه.
هى حاولت تقاوم انجذابها ليه كتير بس فى الاخر قالت مش مشكلة، نحاول و طالما النهاية ما بنا احتمالتها كتير ليه منأخرش النهاية دى شوية و نحاول يمكن علاقتنا تنجح، و ده من احدى القيم الى بيحاول المسلسل يرسها فى المجتمع الكورى اللى بقى زينا برده، مؤخرا بدأ يقبل علاقة الراجل بست اكبر منه ، بس على خفيف حسب قبول العائلة بيهم.

القصة جيملة جدا ، السينايروا مكتوب كوييس جدا جدا، و الاخراج جميل و ماشوفتش غلطات فيه، المسلسل يستحق المشاهدة سؤاء لمحبى الدراما الكورية او اللى مش عارفينها (مافيش حد يعرف الدراما الكورية و مش بيحبها)

الموسيقى و الاغانى
طبعا مش هتكلم عن الاغانى و soundtracks  ، الاغانى تجنن و الموسيقى تهوس بجد، اللى يسمعها فى المسلسل هيرتبط بيها جدا

للى يحب يتفرج عليه اون لاين او يحمله ممكن من اللينك ده

الى الرجل المجهول .... شكرا

فى واحد ركبت جنبه من كام سنة عمره ما هنساه و بفضل ادعيله ربنا يبارك له كل ما افتكره ، كنت راجعة من الجامعة و اول ما قعدت جنبه ضم رجله و دخل لأخر الكرسى كان تقريبا لازق فى الزجاج ، المكروباص كانت الطرقة بتاعته صغيرة و الكراسى قصيرة ، و سبحان الله كمية الرجالة الزبالة اللى ركبوا اليوم ده فظيعة ، كل واحد ييجى عندى و قال ايه السواق فرمل فزنق فيا او الطرقة ضيقة فكل واحد عدى لازم يحك فيا ، و انا بحاول ادخل لجوه الكرسى شوية من غير ما المس اللى قاعد جنبى، جدير بالذكر انه كل ما واحد يطلع الاقى اللى جنبى عينه معاه لغاية ما يوصل جنبى و اول ما يخبط فيا الاقيه اتضايق و وشه احمر، الكلام ده فى محطة مبرى الخشب اللى العربية كلها ركبت فيها ، قبل ما ندخل على محطة بولاق ، لقيته مش باصص اصلا ناحية الشباك لكن باصص بغضب على كل الفرجالة اللى واقفين جنبى فى الطرقة و كل شوية يخبطوا فيا وانا بحاول على قد ما اقدر اتفاداهم، لقيته بيقولى تعالى جوه احسن ، قولت له يا ريت ، قبل ما اقوم قالى استنى و زعق للراجل اللى واقف جنبى براحته خالص و قاله ابعدج شوية و ارجع ورا كده و زقه قبل ما اقوم عشان مخبطش فيه و انا قايمة ، و قالى عدى جوه، دخلت اقعد فى الكرسى اللى جوه و بعدها لقيته برده ضامم رجله و طالع على اخر الكرسى و مدينى كرسى و نص اقعد فيه و بص للراجل اللى كان واقف جنبى حته بصه ، فرحت بيها قوى
لاول مرة اقعد فى المكروباص جنب واحد غريب مطمنة له انه حمينى ، و انا نازلة فضل يبص لراجل معين كان واقف فى الطرقة فى طريقة بصه ( هقتلك لو جيت جنبها) ، لانه كان واضح عليه اوى انه متحرش،و الراجل فعلا خاف منه و وسع لى الطريق، ربنا يبارك له يا رب دائما و يحمى اخواته و مراته دائما زى ما حمانى فى يوم كنت فعلا هموت فيه من الغضب و قلة الحيلة من كتر الرجالة الزبالة الى خبطت فيا . شكرا ليك جدا

العمر كله فداء انتظارك حبيبي

عندى احساس ابن وسخة
اننا عمرنا ما هنتجوز

بس مهما فكرت
حتى لما فكرت اسيبك قبل كتب الكتاب
فاكر
انا قلتلك ايه
فاكر لما قولتلك انى حاسه ان ربنا مش عاوزنا لبعض
بس احنا اللى بنقاوح
و متمسكين

مهما فكرت
و مهما قولت اننا لو انفصلنا فرصنا مع ناس تانية احسن مائة مرة من فرصنا مع بعض
مهما فكرت

دائما بوصل لنتيجة واحدة
اللى قلتها لك فى الخناقة بس انت برده قولتلى ننفصل
و انا قولتلك انا فكرت و قررت انه لا
انا مهما فكرت
و مهما اتخانقنا و مهما حسيت ان الظروف ضدنا

دائما
دائما بلا استثناء
بوصل لفكرة واحدة فقط
مشهد واحد

انا على اتم الاستعداد انى استنى و اقاتل الظروف و اقاوم
مستعدة استنى كده مكتوب كتابى عشر سنين ( يا رب لأ يا رب)
مقابل انى اقضى يوم واحد فى حياتى جنبك
بتخيل يوم سوا فى بيت واحد
و انا بصحيك اقولك قوم بقى الفطار جهز
و اقعد جنبك نفطر سوا
بتخيل و انا بجرى عليك احضنك و انت جاى من الشغل
بتخيل و انا بغنى فى المطبخ و انا بعملك الغداء
و اقعد على حجرك و احنا بنتغدى
و نقعد نتفرج على فيلم و انت متعصب من كلامى و تعليقى و كل شوية توقفه و تقولى بس بقى
و انا اضحك و اسكت و احاول امسك نفسى متكلمش
بتخيل و احنا نايمين بليل فى حضن بعض
و بس
يوم واحد بس
انا راضية انى استنى طول عمرى عشان اقضى معاك يوم واحد بس

دائما بوصل للنتيجة دى

الصراحة
كل البنات بتحلم بتحلم بالشاب الغنى اللى يجيبلها شقة فى المدن الجديدة و العربية و فلوس بالهبل
حتى انا بحلم بكده
بس انا لو هختار
هختارك انت
بكل ما فيك
من حلو  و حش
انا عاوزاك انت
مش عاوزة حد تانى
و بعديك
لو لا قدر الله انت مت
بعدك
مش هفكر فى حد تانى
هقارن كل واحد بيك
و مافيش حد زيك
مش بس صعب ده مستحيل


الخلاصة
مهما مرت علينا ظروف و عقبات
انا على اتم الاستعداد استحمل
بس
عشانك انت
انت و بس
عاوزاك انت و بس
و مش مهم اى حاجة تانية

طبعا الكلام ده بيتقال عليه رومانسية خيبانة
و قولها تانى
للى بيقول الحب مش هيعشيكى
هقول تانى

الحب مش هيعشينى بس الحب هيخلينى استحمل الجوع
الواحدة تقدر تستحمل اى شئ مع جوزها اللى بتحبه
لكن ماتستحملش اى تنتوفه او هفوة من جوز غنى و امور و واجهة بس مش بتحبه
 

تبا للنوم اللعين

بقالى اسبوعين بنام 5 ساعات او اقل
انا!!!!!!!!!!!!!!
انا اللى مافوقش من النوم الا لما انام بالضبط 10 ساعات فى اليوم

يلا بقى ما هى خربانة خربانة
انا ورايا ايه يعنى

 الساعة الان 7.30 الصبح
و مافيش اى بارقة امل انى انام الساعتين الجايين

و الله ما انا نايمة اللى لما يكبس عليا النوم
انا هتحايل كل يوم عليه بالساعتين و التلاثة عشان يشرف

انتى احسن واحدة

قد ايه انا محتجاكى يا ماما
قد ايه انتى واحشانى
قد ايه انا عرفت قيمتك

على الرغم من كونك قليلة الحيلة
لكن لما كنتى تشوفى خناقة كنتى تحاولى تتكلمى
تحاولى تفضيها حتى لو بخناقك انتى مع اللى بيتخانقوا فى موضوع تانى عشان تفضى خناقهم
كنتى بعدها تروحى تكلمى الطرفين كل واحد لوحد على جنب
كنتى بتحاولى على الاقل تصفى نفوسهم
كنت رابطانا ببعض
كنت ملاك البيت و شيطانه

على قد ما كنتى بتتخانقى معانا
و بتنكدى علينا
و مطلعة عينى و مقرفانى من الدنيا

فى المقابل
كنت حنينة اوى
و طيبة
و على طول بتحاولى تسعدينا بهداياكى
و على طول بتلبى طلباتنا مهما بلغت حتى و انتى لسه متخانقة معانا
عمرى ما طلبت منك حاجة و ماجبتهاش

احسن حاجة كنتى بتعمليها
هى العدل
لما حد يطلب منك فلوس زيادة عن مصروفه يشترى حاجة
تقوليله لا قدام اخواته ، و تقولى اتصرفى بمصروفك او حوشيه مع الشهر الجاى
يقولك طيب اخصميها من الشهر الجاى تقوليله هشوف
بعدها على طول لما يكون لوحده
تروحى له و تديله الزيادة رقم صحيح
يعنى اللى بيطلب 30 بتديله 50 جنيه و اللى بيطلب 80 تديله 100
و تقوليله فى الخباثة الفلوس اهى بس ماتقولش لحد انى اديتك عشان محدش يزعل
و تانى شهر مكنتيش بتخصميها
و تروحى للباقى فى الخباثة ، كل واحد لوحده
تديله نفس المبلغ لو عرفتى او اقل لو مش معاكى
و تقوليله انا معايا فلوس زيادة خد شوف لو عاوز تشترى حاجة
و ساعات كنتى تقوليله انا اديت لاخوك و هديك زيه بس متقولش لحد
مكنش حد ياخد اكتر من التانى ابدا
اللى محتاج زيادة بياخد لو تقدرى تدى للكل حتى لو الباقى مش محتاجين
لكن كنتى عارفة يعنى ايه عدل
مع انك جاهلة
محدش علمك
و كنتى بيضاااااااااااااا خالص
لا عندك ثقافة ولا علم ولا خبرة
بس كان عندك فطرة
و طيبة و امومة
و عارفة يعنى ايه عدل ما بين الاولاد



اكتشفت قد ايه اتى كنتى احسن من بابا مليون مرة
اكتشفت انك فعلا كنتى عمود البيت
العمود اللى الكل مش واخد باله منه

اكتشفت متاخر
سامحينى
انا بحبك

لمحة الضوء

ست سنين راكبة مركب فى بحر واسع ببص على المنارة
ست سنين و لسه موصلناش للمنارة
كل ما اقرب منها
تبعد

يا رب
قرب البعيد

انا البنت اللى متعرفش تتهنى بهدوم نضيفة بعد الاستحمام من غير ما تتبل و تتبوسخ من ام النيلة المطبخ

زمان و انا صغير

زمان
كنت اقدر اهرب من اى مشكلة او غضب بالنوم
كنت بعد كل خناقة اقوم اغسل وشى ارجع طفلة بتضحك من جديد

زمان
كنت بعيط لما اتخانق مع حد
عياطى كان المسامحة
طول ما انا بعيط طول ما انا هنسى المشكلة بعد الخناقة

زمان
كنت بعدى حاجات كتييييييييييييييرصغيرة
و اتحجج لكل واحد
اصله مشغول اصله تعبان اصله جعان!!!

دلوقتى
بقيت مش عارفة انام من كتر الغضب
عندى اكزيما عصبية و مثانة عصبية و مشاكل فى المفاصل من العصبية و ضيق تنفس من العصبية و بقع فى الجلد من العصبية و ضغط واطى و اغماء من العصبية
دلوقتى
بقيت بفهم كل كلمة و كل اشاؤة و كل تلقيح بالكلام
دلوقتى
بقيت حاقدة و غلاوية و بشيل فى قلبى من اى حد

دلوقتى
مبقتش فاطمة

دلوقتى
بقول يا رب
اشرح لى صدرى و فرج لى همى 

بطنى وجعتنى من كتر البراشيم

زمن انتهاء الفرحة

حتى ف احسن اللحظات المنتظرة
كان فى حاجة منفصة عليا
مكنتش عارفة افرح معرفش ليه
حاسة ان فى حاجة اتكسرت جوايا
انى افرح
مبقتش عارفة افرح
انا اسفة