حلم وحش اوى

حلم وحش عكنن عليا
يا رب مايتحقق ابدا
ابدا
يارب

عطشانة

انا البنت اللى تقوم من النوم من كتر العطش تشرب
تلاقى مواعين، تغسلها ،و تنسى تشرب.
انا اللى لما ابقى عندى ناس فى البيت اشغل الاربع عيون و الفرن و تقف على السلطة و الحوض تغسل و تقعد ساعتين تقول : فى حاجة ناسياها
و بعد ما تأكل الناس و تغسل المواعين و تقعد ترتاح تقول: آه دا انا كنت عطشانة من 3 ساعات و نسيت انى اشرب
انا طوووول عمرى اول حاجة اعملها الصبح انى افطر بيض
دلوقتى على طوووول اول حاجة اعملها انى اغسل المواعين عشان اعرف اكل بيض
انا عاوزة غسالة اطباااااق

انا اتخطبت

الحمد لله و الشكر لله
انا اتخطبت
القعدة كانت حلوة و مفرفشة
و سلسة و الامور سهلة
ما شاء الله ولا حول الا بالله
الدنيا خلصت زى ما احنا عاوزين
انا فى فرحة عجيبة
عاوزة اتنطط فعلا
بس حد يدينى فرصتى
اتنطط و اقول هاااااا
زى ما عملت اول ما طلعت من الصالون
دخلت الاوضة و قعدت اتنطط و اقول هاااا
بس اتكعبلت فى ديل الفستان
الحمد لله
يا رب تممها على خير

كله ورا بعضه

الساعة خمسة الفجر
هموت و انام
و بردانة جدا و مش لاقية حاجة اتغطى بيها
عبدالرحمن جاى بكرة
و لازم انام كويس
عينى وجعتنى و قعدت اهرش فيها
لغاية ما عملت كيس مياه حوالين النينى
و الحركة دى وحشة جدااااا
بكرهها
و ورايا بكرة خمسميت حاجة اعملها
و هموت وانام
و بردانة
و السلام ختام

جاى بكرة

عبدالرحمن جاااااااااااااااااااى بكرة
ان شاء الله جاى بكرة
جار بكرة
هااااااااااااااااااااااااااااااااا
يا رب تمها على خير

وانت كمان

من كتر ما فرحت بكلمة وحشتينى
معرفتش ارد
ضحكت اوى
و خوفت اقولك و انت كمان ماتصدقنيش
او تقولى انتى خليتى فيها انت كمان
ضحكت اوى و كتمت الضحكة
فرحت وحاولت اقولك و انت كمان
وحشنى القعدة معاك
وحشنى اشوفك
اصلك كنت لسه قايلى انا مش طايقك
فكان لازم اخاف ارد عليك لما تقولى وحشتينى
خوفت اقول حاجة تبوظ سعادتى بالكلمة و تلقائيتها بالنسبالك
خوفت ترد رد يبوظ فرحتى بيها
خوفت تقولها و ترجع فيها
فمتكلمتش كتير
فرحت بيها اوى