صديقة شبهى

دورى على صديقة
اسعى انك تقربى من اللى تعرفيهم
دورى على صحاب
مشكلتك انك مالكيش صحاب
دا اى كلام فى الهبل
ادور ازاى يعنى على صحاب
و اسعى ازاى يعنى
اللى اعرفهم اه بكلمهم و اه بنقول حاجات لبعض بس مش كل الحاجات
مش مقربين
مش فاهمة ليه محدش عاوز يفهمنى لما اقول انا عاوزة واحدة شبهى
واحدة اقدر اقولها على كل حاجة
بتفكر زيى ليها نفس خلفيتى نفس اهتماماتى
فاهمانى و مساندانى
واحدة اقدر اكون معاها صدرقة وفية
اقدر اقف جنبها افضفض لها و تفضفضلى
و مش عاوزة صداقات التليفون و النت دى
معنديش مشكلة انى اتعرف على واحدة على النت بس الاهم انى اقدر اشوفها
نروح بيوت بعض
نخرج سوا و نتقابل لما تحتاجنى تلاقينى مش اواسيها بالتليفون
انا اصلا معرفش مواساه التليفون دى عاملة ازاى اصلا
و اللى اعرفهم مافيش واحدة فيهم تحقق اى شرط من الشروط دى
اه عندى صحاب يطلق عليهم معارف زمايل
لكن مش مقربين و حاولت اخليهم مقربين معرفتش
و ايه حكاية ادور على صحاب دى؟!
ادور ازاى يعنى!!!
الصحاب بنقابلهم من خلال الدراسة و الشغل و الخروجات
و انا خلصت الحاجات دى
يبقوا هييجوا زى ما هييجوا بقى
و الحق
انا فعلا محتاجة صديقة شبهى و ليها نفس اهتماماتى
بحاول اتعرف على ناس على النت بس انا مش من الناس اللى بتعمل صداقات مع اى حد
و من احد اسباب وجود المدونة هى العثور على صديقة شبهى
لما تقرأ افكارى و ظروفى و اهتماماتى تتواصل معايا
يمكن فيه حاجة كدة و يمكن لا
الخلاصة
انا خلاص مش هصاحب حد لمجرد وجوده معايا فى الدراسة مثلا فمافيش غيره
او غيرها يعنى انا افضل اتكلم بالمذكر
انا هصاحب اللى شبهى و بس
و السلام ختام