كل ما يتفتح موضوع اهلي و مشاكلي معاهم،  او موضوع تجاهل و ظلم بابا ليا و الفلوس، و يتكرر الكلام عن الفرح و الجهاز و الظلم اللي اتظلمته، بعيط جامد و قلبي يوجعني لمدة عشر دقائق،  و مافيش حاجة بتهديني غيرك،  اني اتجوزتك و بقيت معاك، ده بيشرح صدري و يخفف ألمي و غضبي، ابص حواليا و اقول انا في بيت عبدالرحمن، الحمد لله انه رجعهولي،  مش عاوزة غيره
واهدي 😊

اللهم لك الحمد

من ساعة ما اتجوزت و انا مش بكتب كتير
يمكن عشان اتعودت ان ده مكان الفضفضة و الشكوى

الحمد لله انه رجعلي عبدالرحمن
الحمد لله علي اللي حصل ده لانه غير حاجات كتير جدا

انا مش بكتب لاني سعيدة
سعيدة جدا جدا
لاول مرة في حياتي اعرف يعني ايه راحة البال
اللهم لك الحمد والشكر على نعمتك

عبدالرحمن هدية من الله تعالى
احلي و اعظم زوج في الدنيا
كل ايامي معاه سعيدة و حلوة
اسلوبه معايا تحفة
حنيته و كلامه و تعامله
كله حلو

انا سعيدة و راضية
و مش ناقص غير اني اشوفه سعيد و راضي
هو ده الشئ الوحيد اللي وحش في جوازنا
شغله صعب و تعبان فيه جدا و مش عارف يرتاح ابدا ولا يرضي
يا رب اشرح صدره و اشفي قلبه و صفي ذهنه لشغله يا رب

يا رب شكرا على عبدالرحمن
شكرا لاعظم نعمة بعتهالي
ربنا اجمعنا في الدنيا و الآخرة سوا دايما

قرار العمر) الكيتو (

انا مش هقعد طوال عمري تعبانة
بعد العيد ان شاء الله هبقي كيتو على طول
طوال العمر للأسف
الكيلو حلو،  اعترف و أقر انه احسن نظام غذائي موجود في العالم
نظام يعالج اي مرض عندك من اول الضغط و السكر لغاية التحكم في السرطان
نظام يدي طاقة لا نهائية و يخلي خلايا جسمك كلها تتنطط من الفرحة

بس أكله محدود بشكل فظييييع في زمن مغرياته كتير

بس انا رافضة تماما اني اعيش في قرف السكر و تعبه بسبب تفاحة ولا حتة بسهولة!

ماينفعش ابقى عندي 26 سنة و تعبانة كده
ماينفعش ابقى عندي التهاب في فقرات الرقبة و أعصاب بتقتلني من الوجع كده
ماينفعش ايدي توجعني و انا بعمل تريكو
أو اني اتعب و انا قاعدة بذاكر
أو اني معرفش احضن زوجي و انا نايمة عشان رقبتي وجعاني
أو اني اقعد بالشهور معرفش امسك كباية الشاى بأيد واحدة
ماينفعش أفضل اتقلب على السرير سبع ساعات مش لاقية وضع على الأقل مش بيوجع) مش هقول حتى وضع مريح(
ماينفعش مابقاش عارفة اخس و أفضل طوال عمري بعاني
ماينفعش أوقع الأطباق من أيدي أو اني اتعب و انا بقلب الرز
ماينفعش يوصل بيا الحال اني اعيط عشان من عارفة اسرح شعري عشان البس الحجاب و اروح الدكتور

مش هقبل ادوغ و انا لسه واكلة من ساعة
مش هقبل احس بإحساس الجوع البشع ده لمجرد أن السكر اتحرق و الضغط وطى مع اني مش محتاجة أكل
مش هقبل ابقى عندي أربعين سنة و اشتكى من مفاصلي ) اللي بشتكي منها الان اصلا(
مش هقبل ابقى ست عجوزة تخينة ظهرها محني و مش لاقية اللي يطلعها الميكروباص
مش هقدر اوصل نفسي لمرحلة العجز المريض و انا في أيدي الآن اتجنبها

المصيبة
اني مش هقبل ييجي اليوم اللي مقدرش اشيل فيه ابني عشر دقائق) لما بشيل سولي القط خمس دقائق بتعب(
مش هقبل اني مقدرش أجرى و العب ورا ابني

عشان ايه!  حته عيش ولا صباع موز ولا تفاحة
مش مستاهلة
و الله مش مستاهلة خالص
صحتي اهم
جسمي اللي هتحاسب عليه يوم القيامة أهم
الصحة بالدنيا
و الصحة في ايدينا
ربنا المعين

من صدرك استمد قوتي،  من رائحة جلدك اعطر أنفاسي
لا شيء على الأرض يهمني غير وجودك و حبك لي
لا شيء يجعل مني امرأة سوى كلماتك و قبلاتك
احبك

أحسن حاجة حصلتلي في حياتي هي إني اتجوزت عبدالرحمن
اللهم احفظه و أعني على طاعته و رضاه

عاوزة عثمانلية من قويدر

لأول مرة من سنيييين طويلة ييجي شهر مارس و اكون سعيدة فيه
لأول مرة مكنش مرتقبة عيد ميلادى و مين هيقولي كل سنة و انتي طيبة و مين لا
لأول مرة يقرب عيد ميلادى و مكنش عاوزة حاجة خالص
أنا راضية تماما
كل ما أفكر السنة دي فيها تبهر اقول السنة دي فيها عبدالرحمن
هشوفه في أول اليوم و اخره
هنام في حضنه
طالما هو معايا هو هديتي
فعلا أنا راضية تماما
و مش عاوزة حاجة و مش عاوزاه هو كمان يحيبلي حاجة
عاوزة اشوف ضحكته لما يدخل البيت و يكون رايق و مبسوط
عاوزة اشوفه راضي هو كمان
يا رب وارزقه الرضا

على قد ما كان قلبي واجعني، أول ما شوفت صحته و هو بيحاول يصالحني سامحته في لحظتها بس كان قلبي واجعني أنه مش عارف هو عمل ايه اصلا، دائما بيكرر الحاجات اللي مش عارف فيها هو عمل ايه غلط، لما قلت له، كشر و ماشوفتش ضحكته الحلوة ثاني، عاوزة اشوفها عشان أهدي و ابطل عياط.
مش عاوزة زعل ولا خصام .

قلبي يوجعني اوى اوى
زعلانة اوى و مش عارفة أهدي

حبيبي راجع

ناقص نص ساعة و عبدالرحمن يوصل المطار

انا فرحانة فرحة عجيبة كأني في يوم فرحي مستنية جوزي 

ربنا يرجعه بالسلامة

وحشني اوي اوي اوي

حبيبي جاي خلاص

هشوفه بعد سفر تلات اسابيع

كتير اوي تلات اسابيع كتير 

حبيبي رجع خلاص

بُعد الزوج اللي بتحبيه وحش اوي

اوحش شئ في الكون 

ارجع بقي

ارجع اسبوعين عذبوني 

انا مستحملة و ساكتة اهو

البعد وحش بس عدم التواصل اوحش 

بس ماتقنعنيش ان الواحد معندوش اربع ثواني يدوس فيهم علي الفويس ميل في الواتس آب و يقول صباح الخير 

انا متضايقة اوي

غيابك وحش

امبارح كنت هعيط بس معيطتش

بشغل قرآن بليل بصوت عالي خايفة يكون الجيران منزعجين منه

قمت اوطي الصوت لانه فعلا كان عالي

سوليفان قام معايا بس الدنيا كانت ضلمة مشفتوهوش

بعد ما وطيت الصوت و دخلت الاوضة سمعت خبطة علي باب الشقة 

اتخضيت قومت لقيت سوليفان ليه جاي من الصالة

قلت له خوفتني و حطيته علي السرير 

مع اني عارفة اني قافلة الباب بالمفتاح و الترباس و السلسلة بس قلت لا انا مش هتطمن الا لما اشوف في خد بره الشقة ولا لا

مع اني عارفة انه كان سوليفان بس مقدرتش اسكت

قومت شوفت ملقتش حاجة طبعا 

دخلت انام تاني في جند السرير مش في النص و متضايقة جدا اني عارفة انام براحتي

الان اصبح اني انام براحتي شئ غير مريح

عاوزة عبدالرحمن ييجي ياخد اكتر من نص السرير و يزنقني في اخره عشان اعرف انام

وحشني اوي اوي

متضايقة جدااااا

غيابه طال

وحشني جدااااااا 

سوليفان مسليني جدا و مقوي قلبي 

لولاه كان زماني بموت لوحدي

يا رب رجعه بالسلامة

ريحته

مافيس احلي من النوم في بيتي انا و جوزي

و النوم مع ريحة جوزي

محدش ليه غير بيته

انا لابسة جاكت رجالي تخييييين
و ماغطية بكبرتات
 الدنيا وسخة و ريحتها وحشة
و سولي بياكل حاجات عجيبة من الارض

محدش بيرتاح الا في بيته فعلا
انا عاوزة اروح 

بقيت بتحكم في دمعي كتير

بمسك نفسي و اعرف معيطش لو الموقف سريع

و بتنزل دمعة مالهاش لازمة لو الموقف عدي عليا قبل كده او تخيلت نفسي فيه

عن الأفلام اتحدث

انا مش بعيط علي المشهد و الممثل

انا بعيط لو مكانه هحس بايه

لكن الدمعة الوحيدة اللي مش بقدر امسكها

اللي بجري علي المطبخ او الحمام عشان مايشوفهاش

هي في اول جزء من الثانية اول مافتكر انا عملت فيه ايه

اول ما افتكر يوم ما قلت عاوزة اتطلق

اول ما افتكر كلمة انتي طالق

اول ما افتكر انه كان ممكن مايكونش جنبي الان

انه كان ممكن يكون مش موجود

اني ممكن اكون ماسكة سراب و هصحي الاقي نفسي لسه متطلقة

صدري بيوجعني اوي

و بعيط بحرقة اوي

و بجري اخبي العياط

و اغسل وشي مياه ساقعة عشان مايبنش عليه حاجة

و احس ابشع احساس في الدنيا

اني وسخة اوي و زبالة اوي و ماستحقش وجوده جنبي

انه نعمة مستحقهاش

و احمد ربنا

كل يوم احمد ربنا عليه

و اشكر نعمته عليا انه رجعه ليا

الان

فعلا انا مش عاوزة شئ

انا حاسة براحة نفسية عجيبة اول مرة احسها في الدنيا

هو كفاية

لا يهمني شغل او فلوس او شئ

هو مكفيني بوجوده فقط

انا عاوزة اشتغل و اجيب فلوس و اعمل شغلي اللي بحبه

بس لو مافيش معنديش مشكلة خااالص

هو مكفيني 

هو و بس

اللهم احفظه و ارضيه و اعني علي طاعته و طاعتك يا رب