نزولي الشغل

علي الرغم من إني عاوزة انااااااااااام

و إني بقوم الساعة ٦ الصبح و انزل افتح المصنع 

و ببقي الصبح ماشية زي الزومبي غير واعية و نفسي اطلع البيت اكمل نوم

مع استمتاعي بالهواء الصبح و نور الصبح 

و هتفحت اسبوعين انا اللي فتح المصنع و انا اللي بقفله

الا ان فعلا الشغل نعمة

و بقيت عاوزة اتأخر في رجوعي للبيت علي قد مت اقدر

بتعصب اضعاف مضاعفة عن كل حاجة صغيرة في البيت

الشغل حلو حتي و انت مش بتعمل حاجة

علي الاقل بتساعد في معلومات

دماغي بقت صاحية اكتر

بستجيب للطلبات اسرع

بخمن اللي قدامي عاوز ايه بالضبط حسب معلومات سابقة لمشكلات بيواجهها 

المكان كله معتمد عليا

داخليا

يعني في انتاج الشغل

انا عارفة مين بيعمل ايه و هيحطه فين و بعده ايه

عشان كده كنت عاوزة انزل المصنع من البداية

عاوزة احضر طلوع السلم بكل خطواته

نفسيتي بقت احسن

اعصابي احسن بغض النظر عن فلتانها في البيت 

استيعابي بقي احسن

حتي حاجز نزولي من البيت اختفي

في اي وقت ممكن البس و انزل

و علي الزغم من قلة النوم و عدم تضبيط الاكل

الا اني مبسوطة 

و مش مشكلة مانامش

انا صحتي احسن و حركتي اخف

فعلا قعدة البيت قاتلة

لازم شغل ما غير شغل البيت

لازم الست تشغل دماغها في شئ يتطلب اكتر من شخص

انها تعمل هواية لوحدها مثلا لا يكفي

لان بيكون عندها الوقت كله

مهما تفكيرها بقي بطئ محدش بيستعجلها

لازم يكون في جماعة

لازم مشاركة

انا احسن

و عاوزة ابقي احسن دائما 

احسن و احسن

يا رب وفقنا و ارزقنا و اشفينا

سامح لكن إياك ان تنسي

Heart broken

قد ايه كنت مبسوطة و فخورة بنفسي

و الاهم اني حاسة بفخرك بيا

و في عز فرحتي 

الاقيت تقول  و انا تعبان مين هيفتح و يشغل المكان

فاطمة هي اللي هتفتح

بس ااوزة حد جنبها

فاطمة هتشغل المكان لوحدها كده

هي يعني .....

فلازم حد يشغل المكان

ثانية واحدة ، ايه؟!!

انت عشان تنزلهم الشغل تنزلني انا في نظرهم

ناقص تقولها انزلي مارسي هوايتك المفضلة 

و طلعي عين ابو فاطمة

و هزأيها و مرمطيها

عشان هي عيلة مش عارفة تشتغل

شكرا

علي قد الزعل علي قد التفاؤل

علي قد ما انا متعكننة ان الشقة دي طارت من ايدينا

علي قد ما انا متفائلة

بالرغم من تشاؤمي من الحياة كلها 

الا ان الحاجة الوحيدة المتفائلة فيها

هي ايماني التام بقدرة ربنا علي انه يرزقنا بشقة احسن منها

و في غمضة عين

زي الشغل اللي جه بعد تعب في غمضة عين

و الشقة الحلوة اللي ضاعت بسبب افعال البشر 

جت في غمضة عين و واحت في كام يوم من تداول الكلام الكتير من البشر

لكن ربنا جابلنا فرصة تحفة

و هيجيبلنا غيرها

ربنا عارف اللي في قلوبنا

و عارف الظروف

و عارف قد ايه احنا بنحبه

و دائما بنحاول نرضيه

و نزود حبه في قلوبنا

فعلي قد الزعل و العكننة

متفائلة

ربنا هيجيبلنا كل شئ 

ربنا هيعوضنا عن كل شئ

ربنا كريم

يا رب اجمعنا علي حبك و حلالك و رضاك

يا رب

يا رب وفقنا و اكتب لنا الخير في الموضوع ده

يا رب تمه علي خير و سلام

يا رب اجمعنا علي حبك و حلالك و رضاك

و ارزقنا رزقا حلالا طيبا مباركاً فيه

يا رب

محدش يلمس حاجتي

انا زي ماما في بعض الحاجات

منها 

مبحبش حد يدخل مطبخي :@:@:@

مبحبش حد يامس حاجتي و يبوظها

و اكيد اكيد مش بيرجعها زي ما كانت

ليه القرف ده

يعني ذالما الحاجة مش بتاعتك لوحدك يبقي خلاص

تستخدمها و ترميها

او تسئ استخدامها

انا عاوزة اتجوز بسرعة

و سكون ليا حاجتي لوحدي

لوحدي

مطبخي و ادواتي

اوضي و دولابي

كنبتي و سفرتي

حاجتي لوحدي

انا بعرف احلفظ علي الحاجة كويس اوي

الحمد لله

بس شييييل ايدك من عليها انت

بلاش حد يتدخل في حاجتي

يبوظ ترتيبي او يخبط و يرزع فيها او مايغسلهاش كويس

او الاسوء

انه يستخدمها و يمشي

في بيتي

اللي هيدخل مطبخي هيدبح

محدش يعمل حاجة بدون اشرافي

اخرك تعمل كباية شاي

حتي زي مامتعودين في العيلة لما يكون في عزومة كل واحدة تتناوب علي المواعين

اعتقد اني مش هسمح بده كمان

يمكن اخرهم يغسلوا الاطباق

غير كده ماتلمسيش حلة و لا طازة مش عارفة التعامل معاها ازاي

حاسة اني هتعصب لو عبدالرحمن قلي بيضين في طازتي حبيبتي

و هبدها علي البوتاجاز

او مغسلهاش

هتجنن

انا جايبة حاجات قيمة بس تحافظ عليها

مش اي كلام

نفسي اقعد علي كنبة فاضية

اللي هيسيب حاجته بره مكانها هيتقتل

يعني ايه بنت تحط شنطتها علي الكنبة عشان كده كده نازلة بيها تاني يوم

و احنا ذنب اهلنا ايه

يعني ايه اصحي من النوم ملاقيش طبق نضيف

و انا ذنب اهلي ايه

اغسلك حاجتك ليه

طبعا في اشخاص مابنفعش تدخل معاهم في حوار زي ده

يعني بابا مثلا

استحالة اقوله اغسل طبقك

الراجل في سن الدلع

كدر و قرف و ربي و تعب و طلع عينه

محتاج اللي ياخد باله منه

لكن حد تاني

بالجزمة

بي المشكلة هنا انها مش حاجتي

ولا ليا كلمه علي البيت كست بيت

لكن عليا مسئولية ست البيت

ااه هو تناقض فحت

تناقض يخلي الواحد يطق

اغسل لكن ماقولش لحد يغسل

اشيل و يتزعق لي اني شيلت حاجة حد واميها في الصالة و حطينها في اوضته

و يتزعق لي برده اني سايبة الدنيا مكركبة

و ده من احد اسباب القائمة الطويلة لتأجيل الخلفة

اولا لاني زهقت من مراعاه ناس مش عاوزين يراعوا نفسهم

ثانيا لاني عاوزة اخد وقت راجة اصفي فيه نفسي

اعيد شحن طاقة الصبر علي الاطفال

استعد لتربية طفل ناضح و واعي و محترم

مش معقد

انا منظمة جدا و مرتبة جدا

بس للأسف ده مش ظاهر علي الاطلاااااااق

لاني لا عندي امكانيات لده و لا اللي عايشة معاهم سايبنلي الامكانيات البسيطة اللي عندي

محدش يلمس حاجتي

الحب

انها تقف طول اليوم تحضر عزومة كبيرة

و في كل تفكيرها الاكل هيعجبه ولا لأ

المهم هو و بس

الحب انه يبوس ايديها لما ياكل

و يقولها شكرا بعينه لما تناوله كباية المياه

و يبوس ايديها تاني لما تقشر له سوداني

الحب انها تتعب

و انها تشوفه مبسوط بيها

و يحاول يعمل اللي يقدر عليه

يشيل معاها الاطباق

يقولها شكرا دائما

تنسي التعب

تفرح

تقوله بحبك

نفسي في كحل الاثمد الطبيعي