هي اللي بتديه دفعة يعمل باقي الحاجات بمزاج
عندي الخاجة دي هي التريكو
انا الان ميتة
الثلاثاء، 26 أغسطس 2014
Free time, no knitting
قد ايه حاجة تعصب
لما يكون كل الاوقات اللي كنت فيها فعلا فاضية و عندي وقت رهيب
هي الاوقات اللي كنت تعبانة فيها و مش قادرة اشتغل تريكو
يا رب
Broken heart
كل ما تيجي في بالي فكرة اعتزال التريكو للأبد حفاظا علي ايدي
قلبي يتمزق
كأني هسيب عبدالرحمن
قلبي بيتمزق جدا و بحس بألم في صدري
بحس كأن عمري ضاع
طوال طفولتي بتعلم كروشيه
و بعدين تريكو
يا رب ماتحرمنيش منه
يا رب بارك في صحتي
يا رب
الاثنين، 25 أغسطس 2014
فرحة مزعجة
الساعة عشرة كنت عاوزة انام يادوبك ربع ساعة و ابتديت ادخل في النوم ، الكوافير اللي تحت كان عنده عروسة و اهلها حاطيت سماعة كبيرة في عربية و مشغلين اغاني بشكل بشع ده غير الالعاب النارية المستفزة ، صحوا اللي نايم و اللي ميت و عشر دقائق و مشيوا، و الله العظيم اللي هيعمل في فرحي كده هيكون نهاره اسود، ده مش بيفرحنا ده بيضايقنا جدا كلنا، الصوت العالي و الصواريخ مش فرحة دي ازعاج للجيران و سيئات لا تعد ولا تحصي و حرق فلوسك في الهواء يعني زيادة السيئات ، ليه الفرحة عندنا مزعجة و مالهاش اي معني ، الاشهار ما الا زغرودة و بس ، طبعا بلاش ننسي كلاكس العربية من بيت العروسة لبيت جوزها، بييب بيييب بب بب بييب ، طوال عمري و هو بيعصبني جدا الكلاكش ده، تخيل انت صحيت كام واحد من النوم سواء سليم او مريض عشان سعادتك تبسط العروسة ، علي فكرة انا مش بتبسط كده ، مش عاوزة حد يعمل الحاجات دي في فرحي ، ماشي.
الأحد، 24 أغسطس 2014
بعد الفتور
تعرف ازاي ان مرحلة الفتور انتهت
لما بعد ما تقفل المكالمة تبقي عاوز تتصل تاني
كأنك مكلمتوش اصلا
الأربعاء، 20 أغسطس 2014
تحب تعرف كل حاجة
حلو اننا نكون عارفين كل حاجة عن بعض
بس ساعات في كلام مش لازم يتقال
انا مش بندم اني بقولك عل حاجة مضيقاني
لكن زعلك و غضبك بيخليني اندم اني قولت حتجة زعلتك
مش عاوزة اشوفك كده
مش عاوزاك تضايق حتي و انت قاعد معايا
مش عاوزة اجرحك
ماتزعلش
انا بحبك
الجمعة، 15 أغسطس 2014
الاوقات الصعبة
وحشتِني
وحشتِني و انت هادي
و انت بتضحك
و انت بتقولي تعالي نخرج
وحشتْني اوقات كتير
لما تفهمني حاجة براحة
لما تقولي بهداوة انا محبش انك تعملي كذا
لما تقولي تعالي نتفق علي شئ
وحشتْني الاوقات دي اوي
وحشتْني كلمة بحبك
بحب اسمع ضحكتك
بحب اشوفك رايق
و قلبي بيتقطع عليك لما تكون مهموم
لما تكون مشغول و نفسك تنام
انا بنسي كل ايام العصبية اول ما اسمع صوتك و هو رايق
يااااااه بحس اني كنت بموت و صوتك الحلو أحياني
كأن معدش علينا ايام زعل او فتور
و اقول في سري يا رب اسعده دائما و اشرح صدره
يا رب خفف عنه و ساعده
و دائما مهما كنت صعب التعامل معاه و متعصب و مش طايق حاجة
ببقي عاوزة اكلمك حتي و انا معنديش حاجة اقولها
انا بحبك
الخميس، 14 أغسطس 2014
الاثنين، 11 أغسطس 2014
لو مافيش تريكو!!!
انا مرعوبة من فكرة عدم تمكني من عمل التريكو بعد كده
انا لو فضلت كده هتضر في يوم من الايام اسيب التريكو حفاظا علي ما تبقي من اعصاب ايدي و كتفي و ظهري
ببساطة الجزء اليمين كله بيقتلني
لدرجة ان في عصب في رجلي من الجنب من اول وسطي لغاية الكعب بيوجعني لما وجع ايدي يعدي عليه وقت
بيوجع لدوجة اني بحس اني قاعدة علي شوك
مش بعرف اقعد منه
طبعا اللي حواليا مش حاسين بده لاني مش ببينه
لاني عارفة الوجع من ايه
عشان كده ببقي عاوزة اعرف كل تنتوفة تطلع عندي دي من ايه
لو مدركة لمرضي و عارفة اسبابه بتأقلم معاه
لكن لو مش عارفة ببقي مش علي بعضي
ده مش هوس بس لازم اعرف انا عندي ايه
المهم
الدكتور قالي اني محتاجة علاج طبيعي بصفة دورية عشان احافظ علي نفسي
انا قلت بعد ما خفيت خلاص انا هحافظ علي نفسي و مش هضغط علي نفسي في التريكو
لكن حسب ملاحظتي ان في دورة معينة بمر بيها
تقريبا ٦ اشهر و ابدأ احتاج العلاج الطبيعي
عشان كده قررت ان كل ٦ اشهر اعمل شهر علاج طبيعي
بس انا فعلا خايفة
خايفة اضطر اوقف تريكو
هعمل ايه!!!
انا مش عارفة هعمل ايه في حياتي
انا حياتي كلها كانت قائمة علي الدراسة و المصنع
انا معرفش حاجة تانية
ماجربتش حاجة تانية اصلا
و كل حاجة كان عندي ليها ميل ليها علاقة بالاشغال اليدوية
البيانو
الخزف
الرسم
الكروشيه
حتي الباترون محتاج رسم
انا دماغي شغالة كده
افهم الاشغال اليدوية
غيرها مافهمش
يا رب
يا رب
ده حبي الوحيد
هوايتي الوحيدة
شغفي
مهارتي
تسليتي
ابداعي
ده شغلي
ده كل حاجة
معرفش غيره
حياتي من غيره ولا حاجة
هعمل ايه بعدها
هعمل ايه
ولا حاجة
هقضيها مسلسلات بس ولا ايه
ده انا حتي بتفرج علي المسلسلات وانا بعمل تريكو بس
من غيره مش بتفرج
اعمل ايه
يا رب
حافظلي علي مهارتي و علي ايدي
يا رب
يا رب
الأحد، 10 أغسطس 2014
الجمعة، 8 أغسطس 2014
حاجات نفسي اعملها
عاوزة اقص شعري
عاوزة احط روج بيج لون شفايفي
عاوزة عربية
عاوزة اعيش في المدن الجديدة (التجمع الخامس و او المعادي الجديدة قدام كرفور)
عاوزة ابعد عن كل ماهو مش شبهي
عاوزة اغير لبسي كله
عاوزة اعيش لوحدي في شقة عبارة عن غرفة واحدة كبيرة وبس
مش عاوزة اكمل حياتي في مصر
عاوزة ابدأ من الصفر
انهي كل شئ قديم و ابدأ من تاني
الاحلام المستحيلة
الخميس، 7 أغسطس 2014
ابعد عن الناس
الناس كلها ولاد ستين كلب
من الاخر يعني
خاصة الاقارب
لانهم بيدوا لنفسهم الحق انهم يتدخوا في حياتك
و لو حاولت تخلي علاقتك بيهم محدودة بينتقضوك
الناس فعلا مابتنفعش حد
الا نادرا
اصبح الناس الكويسة قليلة و الناس اللي بيقفوا جنبك وقت الشدة أقل
مؤخرا ابتديت اقتنع بكلام اخويا
اللي بعيد انك بعشر خطوات ماتحاوليش تعرفيه
امثال بسيطة
احنا دلوقتي في البيت و سمعت صريخ او خناق في الشارع
ماتشغلش بالك انك تعرف ايه اللي بيحصل تحت
بص و شوف
فيه حاجة يخصك
لا
هتنزل تساعد
لا
يبقي يولعوا بجاز من الاخر بقي
اهدي و ريح دماغك
طالما مش هتعمل حاجة
ماتعرفش و ماتسألش و ماتتضايقش
هتعمل حاجة في السياسة و في البلد
لا
يبقي خلاص
هي كده كده في الحالتين هتأثر فيك او في شغلك و معيشتك
سواء عرفت و اتعصبت و ناديت بالصلاح اللي مش هيحصل
او سواء كبرت دماغك و بطلت تاخد الموضوع علي اعصابك
يبقي خلاص اهدي
الخلاصة بقي
الاهل و الصحاب
فيه حاجة اسمها دائرة
اهل البيت في الدائرة الاولي
و باقي الناس بتتدرج في باقي دائرات اوسع
اول دائرة اللي بيحصل جواها ماينفعش مخلوق يعرف عنه
و بصراحة
الناس بتتكلم عمال علي بطال
خلي حياتك الشخصية ليك لوحدك
خاصة الفاسبوك و تويتر
الحسد كل ناس كتير اوي
فعلا
اللي بيكتبوا كل حاجة و يتصوروا و يتباهوا
الحسد علي الفاسبوك لازم يحتسب
فعلا في ناس حياتها باظت منه
السؤال
ماتسألش حد علي اي حاجة خاصة مش هتنفعك
اشتريت تليفون جديد
قوله مبروك و بس
مش لازم بقي شغل نوعه ايه و بكام و حلو و لا لا
بحجة انك عاوز تعرف المعلومة عشان لو هتشتري
لو هتشتري يا حبيبي ادخل علي اليوتيوب شوف الريفيوز بتاعت الناس المختصة
ادي العيش لخبازه
استخدامات الاشخاص مش هتفيد معلوماتك بشئ
يعني ماتسألش حد هو بيشتغل ايه بالتفصيل
ده مهندس و بس
و ده استاذ و بس
و خلصت علي كده
زي ما انت مش حابب حد يتدخل في خصوصياتك مات خلش في خصوصيات حد
ببساطة
هتقولي يمكن احتاجه
هقولك العلم اثبت ان المهمة اللي بيعملها قريبك مش بيعملها بضمير اكتر من الغريب
و انه يشيبها خدمه علي الفاضي
يا ريته عمل خدمة عدلة
و هقولك خلي الغريب يعملها احسن لانك علي الاقل هتعرف تزعق له
هتعرف تقوله اعمل اللي بقولك عليه
هتعرف تسيبه لو مش عاجبك شغله
الحكمة
ماتروحش لحد قريبك يعملك حاجة الا اخوك
فيما عدا ذلك ماتطلبش منه اكتر من السلام عليكم
فعلا البعد ان الناس غنيمة
احسن لك مليون مرة الناس تزعل منك عشان مش بتحكيلها عن نفسك
احسن لك مليون مرة تروح للغريب يقضي مصلحة
عن انك تعرف اي شئ يخصك للقريب
تعامل حسب قوانين الزمن اللي انت فيه
اه في صح و غلط
لو مش هتعمل زي الناس. مش عاجبك الناس
ماتتعاملش معاهم
ببساطة
مش هتموت
مش هم دول اللي معاك لما اسخن و يقعد لخدمتك
كده كده
طز في الناس
انت اعلي من ان الناس تشدك لتحت
اخويا قال كلمة حلوة اوي
انه ساعات بيتخيل انه بيطلع سلم و في زومبي بتشده لتحت
طالعة من تحت الارض و ماسكة رجله. بتشده لتحت
الزومبي دول اخواتك
العيلة و الصحاب و زمايل الشغل مش في العملية
دول ملهم تقدر تدوس عليهم
المهم اخواتك
لازم الاسرة كلها تكون في مستوي واحد
دول اللي هيشدوك معاهم لتحت كل ماتطلع
لو اخواتك مش شبهك و مش هيكونوا زيك
ابعد عنهم
خلي علاقتك بيهم خفيفة
يعني بلاش يعرف تفاصيل. زيادة تخليه يحقد او علي الاقل ينقم علي عيشته
خليك سعيد و ساعده يكون سعيد هو كمان
انا شايفة كده
لو قادر انك تحسن من نفسك لما تشوف اللي اعلي منك يبقي كويس
لكن مش كل الناس قادرة علي ده
في عقليات استخالة تتغير
اصلا علميا استحالة تتغير
ماينفعش يتغير واحد عدي التلاتين او الاربعين
اصلا خلايا المخ المسئولة عن التعلم و التطور ماتت من زمان طالما لم تستخدم
فعلا البعد عن الناس الاقل منك غنيمة
لانهم بيشدوك لتحت
اه بتشوف و تعرف الاقل و تقول الحمد لله علي النعمة اللي عندك
لكن مش تعيش معاهم و ماتعش همومهم
طالما انت مش عايش الهم ده تعيشه مع الناس ليه
ربنا انعم عليك بحياة معينة اشكر نعمته و عيشها
ليه تنزل لتحت
انا بكتب ده عشان افكر نفسي كل مرة اتشد لتحت
اقول لنفسي لا
ربنا اداكي نعمة عشان تستخدميها
مش عشان تعيش اقل منها
الحمد لله علي نعمته
يا رب يديمها و يزيدها دائما
يا رب احفظنا جميعا
الثلاثاء، 5 أغسطس 2014
ايام الصحاب انتهت
بقالي تقريبا سنتين مبقتش بكلم حد
لنا فعليا معنديش صحاب بنات نهائيا
التلاتة اللي لسه بكلمهم يادوبك بطمن عليهم كل شهر
و مافيش تاني
ده راجع لاسباب كتير
اهمها اني كرهت صحوبية التليفون من زمان اوي
بس مؤخرا قررت اني مستعدة استغني علي صحوبية التليفون حتي لو مافيش غيرها
انا عاوزة واحدة حنبي
ازورها و تزورهي
نخرج دائما و نشوف بعض علي طول
نروح كافيهات و سينما و مطاعم
عاوزة اعمل كل الحاجات اللي مكنتش بعملها
مش نقعد نشكي لبعض حالنا في التليفون
ها و بعدين
فين الصداقة لما اكون متصايقة و اقولها تعاليلي
ولا لما اكون مخنوقة من البيت و انزل اروحلها
في اي وقت
علي الرغم من اني انا و ايمان مكناش صحاب بالمعني المعروف
لكن كنا صحاب بجد
نقعد بالشهور مانكلمش بعض
و فحأة الاقيها بتكلمنيو تعيط و تقولي انا تحت البيت هطلع
لما كنت اخب انزل اشتري حاجة اكلمها اقولها يلا ننزل
و هي كذلك دائما
كانت صحوبيتنا صحوبية صيف
نروح وسط البلد نشتري حاحات
ننزل نتمشي في الشارع نشرب قصب
مكناش بنحكي لبعض حاجات كتير الا وقت الخنقة
لما كل واحدة تبقي عاوزة تتكلم و بس
و التانية مش بتسألها علي حاجة
يمكن دي كانت امتر علاقة صداقة متينة كانت عندي و استمرت سنين
حتي الان بعد ما هي اتجوزت و خلفت و عايشة بعيد جدا عني
فجأة كلمتني و قالتلي تعالي علميني كروشيه
روحت البيت و اهلها بيعاملوني كأني بنتهم
بيتكلموا عادي قدامي و بيتخانقوا عادي
ولا كأن في حد غريب و مافيش اي احراج
من الناس اللي فعلا عاوزة اصاحبهم هي مي
لانها فعلا شخصية كويسة جدا و شريفة و بتخرج و تروح اماكل مختلفة
مش مقيدة بفكرة انا مروحش اللي معرفوش
ده غير ان عقلها كويس جدا
من الناس المحترمة الواعية
و شبهي في حاجات كتييير
بي معرفش ليه كل ما اقابلها احس اني مش انا
و اني بسيب انطباع عكس شخصيتي
الخلاصة
اني بقيت مش عاوزة اتكلم و مش قادرة اتكلم
و معنديش طاقة ادخل علاقات
معرفش انا مالي
معرفش
الاشتراك في:
التعليقات (Atom)