needles cables and stitch markers

انا مش مصدقة
الحمد لله و الشكر لله
9 كابل للابر يكفونى ان شاء الله
و طبعا حبيبتى اللى مغلبانى و موقفة شغلى
الاستتش ماركرز
بجد انا فى قمة سعادتى
بجد شكرا ليكى يا مى
انتى أحياتينى

ناس جميلة

فى ناس جميلة اوى فى حياتنا
مش عارفة ليه احنا مش بنقرب منهم
يعنى مى فتحى مثلا
بنوتة جميلة جدا
اعرفها من اكتر من 8 سنين
صداقتنا لم تتعدى المنتدى و الفاس بوك بعديه
مع انها مشتركة معايا فى حاجات كتير
لكن كرهى لصداقة الانترنت و البعد اللى بتحتمه
و وجودها فى محافظة تانية
خلانى ماقربش منها لمجرد انى مش عاوزة اقرب فترة و ابعد فترة
نفس الموضوع مع نورهان و سارة و رنا
كل صداقات المنتدى الحبيب
اللى بعد موته ماتت صداقتنا معاه
انا عاوزة واحدة معايا
صديقة اشوفها 
اروحلها و ترجيلى 
نتقابل لما نحتاج بعض اقدر اواسيها او افرح معاها لما تحتاجنى
نخرج سوا و نتكلم سوا و نشارك حياتنا سوا
انا مش شايفة للصداقة معنى لما تكون من بعيد لبعيد كده
اه انا بدور على ناس كوريين اتكلم معاهم email
بس شغل الشات و الفاس و اللايك و الكومنتات
انا ماليش فيه 

بصراحة انا غلطانة
انا اتكلمت فى الموضوع ده اكتر من مرة
انى ببعد من الاول عشان ما يش اقصر معاهم بعد كده لو مش عارفة اقعد على الكمبيوتر 
مش بحب ان الكمبيوتر يتحكم فى حياتنا كده
و تتحول كل حاجة من حوالينا من خلاله
حتى اجمل الاشياء
نتشاركها من خلال عبوديتنا للتكنولوجيا
مش عاوزة اكون عبدة لشئ
عاوزة اكون عبدة لوفاء الصداقة و مشاركتها

اخلاق الميدان

الكل عارف اخلاق الناس فى ميدان التحرير ايام ثورة 25 يناير
و تساؤلاتنا عن اختفاءها تماما بعد الثورة
السبب بسيط
معرفتك بإن اللى جنبك متضامن معاك و واقف جنبك و مستعد يفديك بعمرك
معرفتك بإنه رافض للظلم و الجهل و اختياره للحق و العدل
معرفتك بده بيخليك تعامله احسن معامله زى ما انت بتتمنى الناس تعاملك
و هو بيعمل نفس الكلام
ليه المصرى لما بيسافر بيبقى محترم
و متحضر و نضيف
و مايرميش ورقة فى الارض
و لما يرجع مصر ممكن عادى يقزقز لب و يرمى على السجادة
لانه ببساطة عارف انه فى بلد نضيفة و فيها قانون بيمشى على الكل
لكن فى مصر اتعود انه يرمى و امه تشيل
و ان اشمعنة الباشا اللى راكب العربية يتضرب له سلام و انا يطلع عينى فى الاتوبيس
المساواة و العقاب بيولد الاخلاق

زمان
كان الاستاذ لو عاوز الفصل يسكت كان يقول اللى هيتكلم الفصل كله هيتضرب
و لما نحتج
يقول اللى حواليه سابوه ليه يتكلم
فاول ما حد يكح بس تلاقى الفصل كله بصله و قاله صه
لكن لو الاستاذ سأل مين اتكلم
اللى جنبه يقول
محدش بيقول
عشان زى ما محدش عاوز يتفتن عليه هو كمان مش بيفتن

بسيطة
اللى مش عاوز يشيل الزبالة مش بيقول لاخوه شيل الزبالة
عشان مش عاوز الكلمة تتردله
و اللى مش عاوز يدفع غرامة رمى الزبالة فى الشارع
بيسلم على جاره و يتسامر معاه و هم سوا رايحين يرموا الزبالة فى الشارع العمومى
و فى الاخر
احنا شعب وسخ
مايمشيش إلا بالجزمة
لو عارفة انه هيتضرب لو غلط
هتلاقيه محترم
لو لف الحاكم وشه الناحية التانية
ممكن ينزل على دماغة يقتله عشان مايحاسبهوش
زى اللى كان بيعمل مشكلة فى الميدان او يتخانق مع حد كان بيتطرد
فالمسألة ليها وجهين
النضيف اللى نفسه يتعامل بنضافة
و اللى بيتصنع النضافة عشان مش عاوز يتطرد

ببساطة

اغانى كورية

beast , bye bye love

فى شئ غريب فى سماع الاغانى الكورية، انا بستمتع بالموسيقى، و الاغانى العربى موسيقاها متشابهة جدا جدا و مملة و متوقعة، الانجليزى اتعودت عليه و بقيت بحفظ الاغنية فى دماغى و بقيت بفهم كل كلماتها، الكورى، بسمع اول مرة الاغنية بالترجمة، و بتعجبنى كلماتها و معانيها المختلفة شوية، دا غير الموسيقى الجميلة اللى مش متوقعة و جديدة بالنسبة لى، الاهم بقى، انى على الرغم انى ببقى حافظة ايقاع الاغنية فى دماغى من كتر ما بسمعها، لكن فى شئ غريب فى انك تسمع اغنية محدش عارف معناها غيرك حتى لو نسيت الترجمة، و موسيقى جديدة، و بستمتع بيها كل مرة اسمعها معرفش ليه كأنها اول مرة، و بتخلينى اعيش فى حلم حياة اخرى غير حياتى، كأنى بخرج من حياتى و اعيش فى مسلسل كورى و لو لمدة ساعة، بحس انى خرجت من البيت و اتفسحت و اتبسطت و عملت كل اللى نفسى فيه ، فى اربع دقائق اغنية، كلام عجيب، بس معرفش ليه محتاجاها، محتاجة اختلاف بعد ما الواحد اعتاد على اللى حواليه و زهق منه، ده غير ان موسيقاهم جميلة جدااااااااااااااااا، موسيقى تضحك و موسيقى تبكى و موسيقى ترقص، و الاحلى، ان عندهم الفرق الشبابية هم اللى بيكتبوا الاغانى و بيلحنوها و يوزعوها، فى امل ، فى روح جديدة دائما، مش زى عندنا، الملحن هو هو بقالة 60 سنة بيلحن لتلات اجيال، و الله حفظناك، دى عينة لأغنية جميلة رقيقة مش صاخبة

قرار تأجيل الانجاب

قرار تاجيل الأنجاب

للأسف، الواحدة تتجوز من هنا ، تحس انها كانت عاوزة تتجوز علشان الخلفة، و فى الغالب، بتبقى لا هى و لا هو مهيأين لتربية طفل و صنع انسان، و فى الغالب برده، بتقى فى المعيشة و الراجل غصب عنه بيتحط تحت الأمر الواقع اللى بتحطه الزوجة و تقوله معرفش انا حامل و عاوزة فلوس و اتصرف، يعنى يروح يسرق ولا ايه، حكمى عقلك، استنى شوية لغاية ما جوزك يحقق احلامه، مش تربطيه فى ساقية العمل لمجرد الفلوس اللى عمالة تشفطيها، انتى بتدمرى جوزك اللى نفسه يشتغل حاجة معينة او يتعلم حاجة او يطور من نفسه او يغير مجال عمله اصلا، انى حلمك انك تتجوزى و تخلفى، حققتى نص المشوار، و النص التانى هيتحقق هيتحقق، ليه الطمع، ده انا اعرف ناس اتجوزوا بس عشان يخلفوا، مش عشان تعيش مع الراجل اللى حبته او ان يكون ليها حياتها و استقلالها، تروح هى كمان تتعلم شئ او تمارس هوايتها، لكن لا، العقلية المصرية تقول، عد تسع شهور بعد الدخلة، لو مخلفتش، تبقى نهارها و نهار اللى خلفوها اسود من الاسئلة و القر و العجن بتاع النسوان، انتم مالكم، و مش عاوزة اسمع من حد تانى كلمه (هاتى واحد و أقعدى عليه)، ايه هقعد عليه افطسه يعنى، بلا غم.

Enough

i had enough
don't test me

على الرغم

على الرغم انك فيك اللى مكفيك و مش طايق نفسك
على الرغم من المشاكل و الصعوبات
على الرغم من نرفزتك عليا
على الرغم من خنقتك من الدنيا كلها
على الرغم من السلبية و القرف اللى بنشوفة فى الشارع و فى التعامل مع الناس
إلا إنك لما بتكون معايا
بتبقى مولع صوابعك العشرة شمع ليا
بتبقى عاوز تشيلنى من على الارض شيل
حتى و انت متعصب عليا و بتزعقلى
بتزعقلى و انت بتفهمنى و بتزعق باقل درجة ممكنة
انت احسن واحد فى الدنيا

أنت

على الرغم انك مش صبور
إلا انك استنتنى خمس سنين
و لسه مستنى
حبيت الصلصال
مع انك مش لاقى ادوات كويسة
عاوز تعمل فيديوهات
مع ان عائدها انتظاره طويل
صبرت على البلد و الشعب
مع انه مش هيتصلح
احلى حاجة فيك
انك ضد صفاتك
عصبى
لكن لو اتحطيت فى موقف بتتحاور فيه احسن من اى محاور عالمى
ملول
لكن بتصبر على شغل مش شبهك خالص
جاد
لكن هزارك بيطلع احلى ضحكة فى نفس الواحد
بتزهق بسرعة
لكن عمرك ما استكبرت بمعلومة عن حد او رديت طلب اى حد بسؤال حتى لو كان شخص غبى او المعلومة مش هتفيده
بذمتك
فى حد كده دلوقتى
الدنيا ماتدتش لك حاجة حلوة
و البلد خربانة
و الشغل اتضرب
و العيشة غالية و زى القرف
و عمرك ما استسلمت
قلت حتى لو البلد دى زى القرف
مافيهاش صلاح
فى بلاد تانية
ارض الله واسعة
مع انك متكتف فى البلد دى
فى احسن من كده
فى حد بيفكر كده
مافيش
يبقى طبعا
انت احسن واحد فى الدنيا
انت اللى بيشتغل
و بيعافر
و بيسعى
و بيجرب
و بيقبل بقسمة ربنا
و يسعى للاحسن
و مابيستسلمش
ولا بيتخاذل
و لما بيعمل شغل
بيشتغل ليل نهار
يتعب تعب مش بتاعه
و يشتغل اكتر من اللى اتكلف بيه
و مابيشتكيش
و بيطبطب على الناس
و يحمسها
و يدور للناس على شغل معاه
مابيخبيش معلومة
و ماينشرش اشاعة
عارف دينه
مابيسكتش على الغلط
و لو على رقبته
عاوز يعلم الناس
ينشر لغته
ينشر لغته دينه
و مش امعه
ليه دماغه
واعى
ناضج
مسئول
طبعا
انت احسن واحد فى الدنيا