هو انا بفكر بانانية عشان عاوزة ماننفصلش؟
تصدق اه!!
وجودى فى حياتك بيسبب لك هم و التزام انت مش قادر تلبيه بسبب الشهادة
بيسبب خنقة انك عاوز تحقق احلامك لكن ماينفعش
لازم تشتغل عشان تجيب فلوس تفتح بيها بيت
و انت قلت الكلام ده اكتر من مرة
انك مستمر فى المجلة بس عشانى
مع انها مابتجبش فلوس عدلة بس فى الاول و الاخر اسمها شغل
عارف ان انا كتير جدا اقول لنفسى انتى جيتى خربتيله حياتى
دلوقتى هيخلص الجيش و يجرى يشتغل اى شغالانة و السلام
و طز فى اى احلام او تطلعات
طبعا مافيش قرصات او ورش هتاخدها
عشان البيت اولى بالفلوس دى
مافيش شغل تطوعى او بملاليم هشان هيوصلك لمنصب محتاجة
المهم بيجيب كام عشان البيت
انا لما لقيت انى معايا الاختيار لما انتى بتعيد تفكير فى الموضوع بقيت بفكر بعقلانية
لكن تاخد قرار الانفصال لوحدك بيحسسنى كانى معايا شيكولاتة بالبندق و جيت انت تاخدها منى
اكيد همسك فيها و هزعق و اعيط و اقولك لا
مع انى مش بحب البندق اصلا
و كنت هاخد قضمة و اديهالك
لكن لما تقولى هتكليها ولا تديهانى و تروحى تجيبى واحدة سادة احسن
اكيد هفكر و اقول لا انت اولى بيها انت بتحب البندق
و بعدين بقى ابقى اجيب واحدة تانية
طبعا ده مش تشبيه ليك و انى من بعدك هشوف واحد تانى من غير البندق اللى مش بحبه
ده تشبيه للقرار
لو اديتنى حق الاختيار مع معرفة اختيارك
هفكر كويس
بس انا مش بعرف افكر لوحدى فى حاجة متخصنيش لوحدى
فى جوانب كتير للموضوع مش بشوفها الا لما حد يلفت نظرى ليها
او يمكن مش عاوزة اشوف الجوانب دى الا لما حد يصدمنى بيها
عارف ان حسن بيقولى نفس الكلام اللى انا بقولهولك
" يعنى عبدالرحمن فاكر انك بعديه هتتجوزى او هتقدرى تعرفى حد تانى. و الله ما هيحصل. دا انتى بعديه هتعنسى يابنتى. انتى مش كده. انا عارف."
و انا بقوله عندك حق انا برده بقوله كده و هو بيقولى لا ده كلام افلام.
انا من بعدك هتجوز واحد كورى :)
بس اللى يشوفنى دلوقتى يقول ايه ده فاطمة مكنتش بتحب عبدالرحمن ولا ايه
عمالة اغنى و اضحك و اروح هنا و هناك و اهزر و انكت و اتفرج على افلام و اضحك
و انا بقول فى سرى دا انتى حالتك وحشة اوى يا فاطمة
شيماء صاحبتى فى المدرسة و اسماء كمان كانوا كل مايشفونى كده يقولوا يا نهار اسود هو ايه المصيبة اللى حصلت
و لو واحدة غلطت و قالتلى انتى حالتك وحشة اوى
تبقى فتحت على نفسها فتوحة عياط لا اخر لها
تقولى دا الهطل اللى كنتى فيه احسن
قضيها هطل احسن
كل واحد عنده طريقة فى التعامل مع مشاكله و ازماته. و دى طريقتى
هطل و فرحة بلا حدود
ربنا يديم علينا الهطل.
بس محدش فاهم الحكاية دى دلوقتى
حتى انت
عمرك ما فهمت ان انا عندى خط رفع ما بين الفرحة و السعادة الشديدة و الحزن الشديد جدا
فى درجة لما بعديها بعد الضحك و الهزار و ادخل على الهطل، يبقى مصيبة
عمرك ما فهمت الحكاية دى
اول الاسبوع حسن كان بيقولى انتى مالك؟ بطلى يا فاطمة تضحكى على نفسك و تقنعيها انك كويسة ، اناى مش كويسة.
بس انا معنديش حل تانى اعمله
يا اما الاكتئاب يا اما الهطل
تحب تختار
مافيش اختيار
دى ممكن تكون قدرة عندى
انى بقنع نفسى انى كويسة
و بقتنع
مع انى مدركة انى بضحك على نفسى
بس مدركة برده انى لو اقنعت نفسى انى كويسة انى هبقى كويسة فعلا
المهم
مازال التفكير مستمر
و مش لاقية حد اتكلم معاه
الوحيد اللى اقدر اتكلم معاه فى الموضوع ده و اخد بكلامه هو انت
اوعدنى
انى لو خسرتك كحبيب و زوج
انى مخسركش كصديق
ممكن؟
يمكن يكون ده اللى هيهون علينا الفراق لغاية ما نتعود و حياتنا تستمر
يمكن!
