قرار بين اتنين

ده مش قرارك لوحدك
و انا مس هسمح بيه
لا مش موافقة
ده مش مسئولية منك
ولا قرار سليم
لا
لا
لا

ماما اعمليلى مركب ورق

مشهد واحد
ماما بتزعق عشان نبطل لعب بصوت عالى و عشان تهدينا تخلينا نقعد معاها نعمل مركب ورق
و نقعد نعمل كل الاحجام و بشراع و من غير شراع

مشهد اتنين
و انا فى الثانوى لما الاقيها زعلانة او قاعدة لوحدها اجيب ورق و اقولها علمينى اعمل مركب ورق عشان نسيتها
تضحك و تقولى والله انتى عمرك ما هتكبرى بطلى دلع
افضل اتحايل عليها لغاية ما تلعب معايا
و تتبسط و تفرح

مشهد تلاتة
لاقيت صورة على الفاس بيعملوا فراشة بالورق
جبت ورقة و حاولت اعملها بس فى خطوتين مش واضحين فمعرفتش اعملها
بعديت حاولت اعمل مركب معرفتش
قريت الفاتحة لماما و قولتلها
ماما تعالى علمينى اعمل مركب ورق
انا نسيت
هعلم ولادى ازاى دلوقتى
ماما تعالى اعلمينى اعمل مركب بشراع بعدين امشى
تعالى اقعدى معايا شوية
وحشتينى اوى يا ماما

فى ناس

فى ناس فاهمهم بس بتكرههم
و فى ناس تحبهم  و على طول فى بالك بس مش بتكلمهم
و فى ناس مش فى بالك اصلا بس لما تقاباهم تقعد تقابلهم تقعد تتكلم معاهم بالساعات و ترتاح معاهم اوى و تقول هو تنا مش بكلمهم ليه
و ترجع تنساهم و ماتكلمهمش
و ناس تحبها و تكلمها و ماتردش
و تبقى فاكرهم طول الوقت و عاوز تكلمهم و هم مش عاوزين
و ناس تتعرف عليها مرة يفهموك على طول
تيجى بعدها بفترة تحكى موقف مثلا تلاقيهم يقولوا بس انت مابتحبش كده او ده مش ذوقك او مش شبهك الموقف ده
كأنهم عارفينك طول العمر
و ناس تفضل معاهم سنين و لسه لا فاهمين بعض و لا عارفين تتفقوا
و ناس تكلمها من السنة للسنة عشان ينزلوا يشتروا معاك حاجة و عمرك لا انت ولا هم قلتوا على علاقتكم علاقة مصلحة لانها علاقة وفاء
لما بتحتاجه بتلاقيه و العكس صحيح
و ناس تكلمها كل يوم و لسه مش فاهم هم قصدهم ايه
و فى ناس بقى لما تبصلك تفهم هم عاوزين ايه
و ناس عمرك ما فهمتهم
و ناس تخاف على زعلها
و ناس يخافوا على زعلك
و ناس منتش فارق معاهم
و ناس مش فارقة عندك
و ياما بنقابل ناس

فتور

ايوة طبيعى بعد كل مرحلة بنقرب فيها بيحصل بعدها فتور
طبيعى
بس المرة دى غريب
الفتور المرة دى غريب
عاوزة اكلمك
بس معنديش ادنى فكرة اقول ايه
معرفش
بس حاسة احساس غريب
خوف يمكن
معرفش
اللى اعرفه
انك وحشتنى
وحشنى الكلام معاك
الهزار
الضحك
و الحكايات

عاوز تحافظ على الصلاة

عاوز تحافظ على الصلاة
فكر ان ربنا هيزعل لو مصلتش
ماتفكرش فى الثواب او المغفرة
ماتفكرش فى تعويضك للصلاة بكرة
فكر ان ربنا هيزعل منك
و هيزعل عليك
يمكن تكون كلمة هيزعل غريبة على الموضوع
بس انا بقيت بفكر كده
بفكر فى كل مرة زعلت فيها بابا
بفكر فى نظرته ليا اللى تفلق الحجر
بيبص كأنه بيقولى اخس عليكى انا بعملك كذا و كذا و كذا و هو دا رد الجميل و الشكر بتاعك!!
ساعتها بعمل اى حاجة عشان مايزعلش
و ممكن افضل ألف وراه و هو ماشى اقوله اسفه ماتزعلش منى
بفكر فى حالة عبدالرحمن لما يزعل منى
و قد ايه ببقى عاوزاه يتصالح
و ساعات كتير بيوصل لمرحلة انه حتى من عاوز يسمع صوتى بقول اسفه
طب هنقول لربنا اسفه ازاى؟
بالصلاة
احافظ على الصلاة
و اقوله سامحنى
و ادعى
لا اله الا انت سبحانك انى كنت من الظالمين
اللهم اغفر لنا ذنوبنا و كفر عنا سيئاتنا و قنا من عذاب النار
و ساعات كتير بتكلم معاه
اقوله يارب انا عارفة انى مقصرة فى حقك و انى بطلب من غير ما ادى
بس انت رحمتك وسعت كل شئ
لما ابقى عاوزة انام و مصلتش العشاء و فعلا تعبانة
و ابدأ اكسل  اقول لنفسى:
يعنى انتى يا هانم لما عبدالرحمن يكلمك تجرى على طول تكلميه بالساعات و لما ربنا ينادى عشان صلاة مش هتاخد عشر دقائق تقولى لا
دا الله سبحانه و تعالى اللى خلقك و خلقك عبدالرحمن
قومى صلى
ربنا هيزعل
زمان لما كان بابا يزعقلنا عشان الصلاة
كنت بقوله انا مش عاوزة اصلى عشان انا خايفة من ربنا او عشان الثواب
انا عاوزة اصلى و انا حابة الصلاة
الان
انا بصلى عشان بحب ربنا
و ماينفعش ازعل حبيبي
ربى اجعلنى من مقيمى الصلاة و من ذريتى
و ادخل نور القرآن فى صدورنا

ماما بتحب الفيلم ده

فيلم ايامنا الحلوة شغال على mbc
اتفرجت على خمس دقائق منه بعدين قلت لنفسى:
اه. دى ماما بتحب الفيلم ده.  اقوم اصحيها عشان تتفرج عليه
و فضلت اتخيل فرحتها لما اقولها و منظرها و هى بتقوم ملهوفة تتفرج عليه مع انها عاوزة تنام. و تقوم على طول على الصالة من غير ما  تغسل وشها او تسرح شعرها.
و شربت بق شاى من الكباية و حطيتها جنبى و جيت اقوم و لبست الشبشب
بعدين افتكرت ان ماما ماتت
و انى مش هلاقيها فى الاوضة
الله يرحمك يا ماما
وحشتينى اوى اوى اوى
انا بحبك اوى
اوى يا ماما
و الله بحبك اوى يا ماما