عبدالرحمن

난 널 사랑해

اتعرفت علي واحدة كورية

اتعرفت علي واحدة كورية
اتعرفت علي واحدة كورية
اتعرفت علي واحدة كورية
اتعرفت علي واحدة كورية
فرحانة جدا جدا
البنت لطيفة و بتتكلم انجليزي بسيط زيي
بس انا بتكلم احسن منها
تصدقوا
انا اصلا ضايعة في الانجليزي
فرحانة جدا جدا

عاوزة ابعد عنك

انا مش زعلانة
انا حاسة بغضب فظيع
عاوزة اكسر البيت كله
غضبانة منك
مش عاوزة اكلمك
مش طايقاك
غضبانة عشان مش عارفة اساعدك
غضبانة عشان مش عارفة اواسيك
متضايقة جدا انك مش بتسمع كلامي لما بقولك حاجة عشان تخرج بيها من عصبيتك او تحل بيها موقف
غضبانة منك جدا لانك صعب كدة
مش طايقة نفسي و مش طايقاك
وجودي بيزعجك
لما بتكلمني لما تبقي متخانق مع حد او متضايق و مش بعرف ارد و نفضل ساكتين ببقي عاوزة ازعقلك
ببقي عاوزة اصرخ فيك و اقولك ما انت لو بتعمل اللي بقولك عليه لو بتسمع كلامي كان زماني الان مرتاحة في الكلام معاك و بعرف اواسيك
لما بيخيب ظنك فيا
و تبقي فاكر انك هترتاح لما تكلمي
ببقي غضبانة اوي و مترفزة اوي
عدم وجودي هيبقي احسن
علي الاقل مش بيقي الناس عليك و انا كمان
مش هيبقي الناس. مش فاهماك و انا معاهم
مش هيتحرق دمك اكتر مني
مش هحس بالعجز
و هبطل اعيط
انا زهقت من العياط
انا زهقت من تشبثك بافكارك
انا زهقت من كل حاجة
عاوزة اجازة

كنت

اهو انا كنت عاوزة اقول كدة
معرفش دلوقتي شعوري كدة ولا لا
بس الأكيد هو قد ايه نفسي يبقي شعورك انت كدة
http://fan6azya.blogspot.com/2009/08/blog-post.html

الندم

الندم مش علي اللي عملته
الندم بيبقي علي اللي معملتوش

أمهاتي

خلاتي اتغيروا خالص
بعد ما كانوا حسين انهم ملوك العالم و الكل عندهم عبيد
بعد العنتظة و الغرور و سوء التعامل
بقوا ملائكة
فعلا ملائكة
بعد كل اللي مروا بيه ربنا هداهم
بقوا حلوين اوي
طيبين مهتمين بينا
معاملتهم معانا و مع الناس حلوة
طريقتهم اسلوبهم كلامهم
كل حاجة فيهم بقت حلوة
حبيتهم اوي اوي
بقيت حاسة اني عندي امهات كتير
فعلا بقيت حاسة ان خالتي هي امي
الاتنين
مبقتش حاسة اني لوحدي و ماليش تم تقف جنبي في فرحي
بحبهم اوي
ربنا يخليهم و يصلحهم و يحفظ اولادهم

عاوز مصلحتي!!!!

لما كل واحد يقولي انتي سهل اللعب في دماغك و بتقتنعي بسهولة و بتمشي ورا اي حد يقولك حاجة
و اسمعي مني انا عشان انا عاوز مصلحتك......
يبقي مافيش حد فيكم عاوز مصلحتي

ستو ماتت

امبارح فات بالضبط تلات اشهر علي موت ماما
و ستو ماتت النهاردة الثلاثاء
الحمد لله ربنا رحمها
روحت الدفنة
كنت عاوزة ازور ماما
قريتلها الفاتحة و كلمتها
قولت لها بحبك اوي يا ماما
وحشتيني جدا
ماتخافيش مش هتبقي لوحدك
ستو جاتلك اهي
ربنا يرحمك يا ستو
ماما بتحبك اوي يا ستو
و ادفنتي جنبها اهو الحمد لله
ربنا يرحم موتي المسلمين اجمعين

مستنية إيميل

بقالي كام يوم بدخل علي الجي ميل و اعمل refresh
و قلبي يدق و انا مستنية يحمل
مستنسة يجيلي ايميل
من مين؟
معرفش
فعلا معرفش
مش عاوزة ايميل من موقع اوحاجة زي كدة
مستنية ايميل من حد يكلمني
حد عاوز يتعرف
حد اعرفه بيسأل عليا
حد بالصدفة
معرفش ليه
النهاردة لقيت رد علي بوست عملته قبل كدة
غير معروف
فرحت بيه جدا
اتبسطت اوي
بجد التعليق ادخل الفرحة في قلبي
يمكن دا اللي كنت مستنياه

حلم الأبر

حلم ابر التريكو بيضيع من ايدي
اهي اهي اهي اهي
الجمارك ممكن تصادر اي حاجة و تقولك مش هتدخلها
و توزعها كمان علي العاملين بها
بمزاج امه يتصرف
دا غير اننا هندفع مبالغ طائلة عليها
يعني احسن و آمن حاجة ان حد يكون جاي من امريكا يجيبها معاه
اهي اهي اهي
تعرف حد جاي من امريكا؟

ركبتي

لما كنت في الثانوي كنت واقفة بكلم صاحبتي
بعدين لفيت عشان اقعد جنبها
و انا بلف رجلي الشمال ماتزحلقتش علي الارض عشان تلف مع جسمي
لكن اللي حصل ان جسمي كله لف الا رجلي الشمال
مفصل رجلي الشمال اتفك و لف النص اللي فوق مع فخدي حوالي زاوية 60درجة
و النص اللي تحت فضل ثابت مع الساق و الرجل علي الارض
حسيت بألم لا يمكن ان يتخيله احد
ألم لدرجة اني مكنتش قادرة حتي اعيط لدقيقة
  بعدها عشت تقريبا اسوء شهر في حياتي
لابسة رابط للركبة و مش بعرف اقوم او اقعد او امشي من غير ما اقول في سري ألف آه
و من ساعتها و انا ركبتي الشمال بتفك لوحدها و انا ماشية
و لفت تاني مرتين بعدها
بس طبعا من زي المرة الاولي
المرة الاولي الدكتور قالي ان اللفة دي خلت المفصل اتفك و اتلف و رجع مكاني تاني
و طبعا الاربطة اللي في الجنب اتمزقت و دا اللي مسبب الألم
و علي فكرة رجوع المفصل تاني بيسبب الم اقوي بكتير من خلعه
و قالي مع المرهم و الرابط هتلتحم الاربطة
و اظاهر انها كانت محتاجة علاج تاني بدليل المرتين التانيين الي حصلت فيهم اللفة دي
دا غير موضوع انها تفك و انا ماشية و اقع
النهاردة حصلت تاني
مالفتش بزاوية كبيرة بس مؤلمة جدا
و مش عارفة انام ولا اتحرك
طبعا لازم  اغسل المواعين و نشرت الغسيل و بكره هطبخ
لكن معلش تهون
المرة دي مش هسكت بقي
كلام الدكاترة المصريين الزبالة اللي كل حاجة عندهم عادي عادي مش هاخد بالكلام دا تاني
هروح اعمل اشاعة و اروح الدكتور و يا رب يطلع عدل
و يا رب اتعالج
اصل ماينفعش يبقي عادي اني افضل حاسة طول الوقت ان مفصل رجلي بعيد عن بعض و الرجل التانية طبيعية مش حاسة بحاجة مختلفة فيها
مش عادي ان المفصل يفك كدة بالمعدل العالي دا
دكاترة حمير
90%من الدكاترة اللي عرفتهم طول حياتي بيقولوا عادي
كل حاجة عندهم عادي
العادي ان مايكنش في حاجة
ان مايكنش في شكوي
ان مايبقاش في كلمة حالات طارئة
الجسم مش بيقول كدة
الجسم بينبه الواحد ان في حاجة غلط
بيقوله حد بالك في مشكلة
هيقولك في شكل صداع دوخة شعر يقع اظافر تتكسر او حتي تعطس بدون سبب
الجسم مش بيتكلم علي الفاضي
لازم يكون في مشكلة حتي و لو كانت نقص شوية ألياف في الاكل او نقص فيتامين
لازم يكون في حاجة
انا طولت كدة ليه
تصبحوا علي خير
ياللي مش موجودين