أنا طول عمري بتبع القوانين
حتي لو كان كل الناس مش ماشية عليها
في المدرسة مكنتش أبدا أنزل من الحصة أو بين الحصص أو حتي في الحصة الأحطياطي
لازم أستأذن المدرس و مشرف الفصل و مشرف الحوش
مع إني لو أستأذنت مش هينزلي
بس القانون بيقول كدة
يبقي مانزلش أصلا
في المحلات لما اشتري حاجة خاصة محلات الطعام
أقف بأدب
الناس تدفع بعض و تحاول توصل الأول
و أنا أقف ولا ست بأعتبار انه صف الستات :)
و معنديش مانع الناس يدخلوا قدامي
أقف لغاية ما اللي قدامي يخلص
و غالبا مش بيخلصوا
لغاية ما البياع يقولي عاوزة أيه
لإنه شايفني واقفة بأدب مش بزق في الناس و مستعجلة
النظام نظام
نفس الموضوع مع كل حاجة
يعني و أنا واقفة علي كولدير أملأ الزجاجة أو بشتري تذكرة المترو أو عند السوبر ماركت
و طبعا كل الناس بيقولولي انتي كدة بتضيعي حقك في أنك جيتي قبل ناس تانية جاية بعدك و دخلت قدامك و مشيت قبلك
و زي ما هم بيعملواأعملي
و أنا بقول لأ أنا هفرض أحترامي و النظام علي الكل
أنا أبدأ و من بعدي الناس تقلد
مؤخرا مبقتش بعمل كدة
و دا مضايقني جدا
في حاجاة كتير جدا أتغيرت فيا السنتين او الثلاث سنين اللي فاتوا
بس ناوية أرجع زي الأول
أنا هعمل الصح و طز في كل الناس
أنا هقف في الطابور اللي مش موجود أصلا
أنا هوسع للناس عشان تعدي مش هسد الطريق
أنا همشي علي القانون
أنا هفرض بأحترامي أن المسئول اللي بتعامل معاه يقولي أتفضلي عاوزة إيه و يمشيني
من غير زعق و لا كلام و لا خطب من نوعية : دي هجمية و لازم يكون في نظام و أقفوا طابور
أنا هقف
و اللي فاهم هيقف ورايا
و بس
