الأعتراف بالخطأ

مثال بسيط
في برنامج master chef
كان في مسابقة بين فريقين المتسابقين
و المسابقة تقديم أحسن ساندويتش برجز لركاب الشاحنات المتنقلة
اللي هي فيها شقة جوة و بيلفوا بيها البلاد
يعني بيأكلوا وجبات سريعة من البلد كلها
الفريق الاحمر حقق نجاح كبير
لدرجة إن شيف من الحكام أخد ساندويتش للفريق الازرق عشان يتذوقوه و يعدلوا في الساندويتش بتاعهم
الكل قال حلو بس مش هينفع نغير بتاعنا الان عشان مافيش موارد لده
واحد فيهم تجادل مع الشيف و قاله حلو بس أنا شايف بتاعنا حلو و أحسن منه
و لو كان وحش فأنا متحمل المسئولية أنا أخترت الوصفة دي و متحمل النتيجة للأخر و مش هغير فيه حاجة
أنا أحترمته جدا
بس بيتكلم بتكبر أو عناد
لكن هو أخد قرار و متحمله 
شايفه صح و مش هيغيره  بسبب الظروف
بعد المسابقة و بعد ما يخسر هيبقي يشوف وجهة نظره و يغير في وصفاته بعد كدة
لكن مش هيمشي مع التيار و خلاص
أخد قرار و متحمل النتائج حتي لو اكتشف في النص إنها غلط
طبعا أنا مش بتكلم عن العناد
لكن بتكلم إن الواحد مايغيرش رأيه عشان الناس شايفة إنه غلط

أنا أحترم جدا اللي يتحمل مسئولية قراره
مش أول ما تقوله هو أنت عملت كذا؟؟؟
يزعق و يتعصب و يقولك لأ مش أنا
و لو أثبت عليه الموضوع يقولك مكنش قصدي
طب معترفتش ليه من الأول

مافيش ناس نزيهة ليه الأن!!!!!!!

أول خاتم

بالرغم من الظروف الزفت اللي احنا فيها
و الضرب و القتل في التحرير
الا اني فرحت جدا بالخاتم
اول خاتم يجيبه حبيبي عبدالرحمن
و بصراحة هو ممتاز
تحفة
مبدع
جميل جدا و شكله عليا يجنن
و طبعا دا المفترض انه كان ييجي بعد ما اخس عشرة كيلو
خسيت اربعة و يمكن اكتر و الباقي في السكة
هديتك دي عمري ما هنساها


انا من ساعة ما عرفتك و انا مستنية اليوم  اللي هتجيبلي فيه خاتم
هو اه طريقة اعطائي ليه كانت غير ما بحلم
كانت حلوة بس كان نفسي تلبسهولي
بس بجد


شكرا شكرا شكرا شكرا حبيبي
شكرا شكرا شكرا


انا بحبك اوي

لينا شماميان بالي معاك

احساسي بالبرد

الاسبوع دا احساسي بالبرد عجيب جدا
بردانة جدا طول الوقت
و وقت النوم بفرك و أتنفض و أرتعش و ببقي مش قادرة أنام مهما كنت تعبانة
و بتغطي بثلاث كبرتات
دا طبعا غير اللبس

النهاردة بقول لحسن أنا بقيت حساسة جدا للبرد و شعوري بالبرد متزايد جدا السنة دي
قالي إنتي علي طول كدة و إحنا عارفين دا
أستغربت و بقوله بجد؟؟
قالي إنتي طول عمرك و إنتي أكتر واحدة بتبردي و بتلبسي كتير جدا

رجعت لورا شوية لقيت كلامه صحيح
أنا فعلا في الصيف بلبس ثلاث حاجات
و ببقي عادي مش حرانة
و في الشتاء بلبس علي الأقل خمس حاجات و بتكتك من البرد
و دا الطبيعي بتاعي من زمان
لكن عمري ما أخدت بالي إني شخص حساس جدا للبرد

now , or never

انا في سن الفعل
حسن علي طول يقولي
انا لو في سنك
مش هتشوفيني في البيت
انا لو عندي وقتك
هعمل حاجات
مش ممكن تتخيليها

now or never

عنده حق 
هو دا السن و الوقت المناسب لأكتساب الخبرات
للعمل
للمعرفه
للموهبة

أنا هموت و اتعلم موسيقي
عاوزة أعزقف علي البيانوا و الكمان
عاوزة أتعلم أنجليزي بشكل محترف
بحلم اتعلم كوري
عاوزة أخس
عاوزة أنزل اتمشي
عاوزة أشتغل شغل خفيف
محمد بيقولي روحي اشتغلي في خدمة العملاء في فودافون
دا هيكسر خوفك من الكلام
و ماتخافيش كدة كدة هتطردي
هم بيشغلوا ناس شهرين و بعدين بيمشوا
بس الشهرين دول هيغيروكي جدا
عاوزة أفصل
عاوزة ابدأمشروع تفصيل ملابس مجلة بوردا
ابدابصحابي
عاوزة اعمل تريكوه و كروشيه و اعمل معرض في الساقية
عاوزة اطلع من المود الزفت اللي انا فيه


لكن


يا رب يعدم الكلمة دي


لكن مافيش فلوس
مع ان في حاجات كتير لازمني فيها بس فلوس مواصلات
لكن لو في النهاردة مش ضامنة يكون في بكرة
مش عاوزة ابدأ في حاجة و أخيب و أقعد في  البيت تاني عشان مماعيش فلوس
فكرت اشتغل في الساقية
في الموقع بتاعهم طلبات شغل خفيفة
يعني موظف يعمل العضويات للناس
حد يقف في المكتبة
او في المعارض الصغيرة اللي عاملنها
مكان محترم هعرف اشتغل فيه من غير ما اتعرض لحاجة و في نفس الوقت مش مجهد
بس لكن
اللي يخليني اشتغل يبقي انزل المصنع أولي
بس مبقتش قادرة علي شغل المصنع
دا غير المرض
ضغطي علي طول واطي
و الصداع
و الدوخة
و نوبة الضيق و الاغماء اللي بتجيلي
مش ضامناهم
مع ان التعب بيزيد من قعدتي في البيت
بس بيزيد اكتر لما بشتغل بمجهود
بقالي كام شهر جايبة المجلة و عاوزة افصل هدوم ليا
عندي الباترونات و المكن و كل حاجة
بس ماعيش مائة جنيه اعمل بيها اشاربات
الان بقي القاعدة الاساسية في كل حاجة


الاهم فالمهم


و اللي انا عاوزاه دا في الفترة دي يعتبر رفاهيات


حتي لما بتفيض فلوس
بيبقي في حاجات اهم تتعمل بيها


و المشكلة الاكبر
اني خايفة يجيلي خوف مرضي من النزول لوحدي في الشارع
انا بقي عندي جنون الارتياب
اي راجل يعدي من جنبي
حتي لو كان عيل صغير
ببص علي ايديه و طريقة مشيته
و ابعد عنه و امشي بسرعة
و ارتعش و مقدرش اخد نفسي حتي
بقيت بخاف اركب مواصلات
و بترعب من المش في الشارع
انزل ازاي و انا بخاف انزل  اشتري حاجة من تحت البيت


فكرت اشتغل في الساقية و بالفلوس اشترك في قرص هناك للموسيقي مثلا
و اروح و اجي مشي
و الطريق مش بعيد
بس بجد مرعوبة


و مش هقدر اقول لبابا هنزل اشتغل في مكان تاني
و مبقتش قادرة اروح الموسكي و اتعرض و لو لنظرة من واحد زبالة
انا عندي الوقت و الرغبة و مش قادرة اعمل حاجة في الوقت دا
في السن الحرجة دي
بعد الجواز معتقدش هقدر اعمل الحاجات دي


نفسي اوي اعمل حاجة مفيدة
بس بقيت بترعب لو رايحة الجامعة مرة في الاسبوع
كأن الناس هيخطفوني بمجرد ما انزل من البيت
مع العلم ان الحمد لله متعرضتش لحاجة
بس اللي بسمعه بيرعبني
و اللي بشوفه في المكروباص لما محدشي يعبرني لو قلت لواحد اقعد كويس
الاقيه هو اللي بيشتم و يزعق و انا اللي معايا الحق
و محدش بيقف جنبي حتي الستات


بقي كل واحد يقول للتاني روح اتحرق بجاز انا مالي


انا خايفة يجيلي رعب من نزول البيت
و حاسة ان كا حاجة فيا كويسة هتموت و يطفي نورها
حاسة اني بموت ببطء في البيت كدة


انا تعبت

أول عيدية

النهاردة حبيبي شحنلي بعشرة جنيه
بالرغم من إني بتضايق جدا لما حد يشحنلي
و بتخانق معاه كمان
إلا إني المرة دي فرحت جدا جدا جدا
و أتنططت كمان
و لما كلمني قولتله هي دي العيدية بتاعتي يعني؟؟؟
قالي كل سنة و إنتي طيبة يا حبيبتي
فرحت جدا جدا
و احساس العيدية منه مختلف
حلو جدا
أول عيدية منه
بجد كان احساس بالسعادة يغمر الواحد بالفرحة
كل سنة و انتي طيب يا حبيبي
و إن شاء الله نكون كل سنة مع بعض

عياط عياط عياط

مش قادرة أفهم سبب عياطي المستمر علي اي حاجة
بقيت بعيط علي الحاجت الحلوة قبل الوحشة
لو أتفرجت علي مسلسل أو فيلم بعيط علي الضحكة قبل الدمعة
في ايه مالي الفترة دي
بحاول أفهم بس مش عارفة
يمكن قعادي في البيت
يمكن مرضي المستمر اللي مخليني مش عارفة أعمل حاجة
يمكن قلة الفلوس اللي مضيعة عليا فرص كتير
يمكن
معرفش
أنا فيا ايه، عمري ما كنت كدة!!!!!!!!!!!!
أنا فيا ايه؟؟؟؟؟

لما بتنسي

مع إني بزعل جدا و بتضايق و بتعصب لما بتنسي
و تلطعني
بس أتعودت أعدي الموضوع
و أدخل أنام و أصحي كويسة و مش زعلانة

التدخين في المواصلات

النهاردة ركبت من ميدان الجيزة ميني باص

و واحد في أوخر الثلاثينات قاعد في الكرسي اللي قدام الباب

و بيدخن و ناقص في السيجارة أخر نفسين

 ندهت عليه : يا حج يا حج يا شيح يا استاذ يا حج 

و عامل نفسه مش سامع

اللي قدامي رد عليا قلت له قوله يطفي السجارة

الراجل لسعه بيقوله يا حج

راح مزعق و انت مالك انا حر 

بقوله معلش اطفيها عشان الدخان

قالي بعنف و عِند : طب مش طافيها مش عاجبك قومي

انا قاعد جنب الشباك

و بص قدامه

الراجل اللي قدامي قالي: خلاص يا بنتي ما هو جنب الشباك

بقوله : يا حج الهوا اللي داخل من الشباك بيجيب الدخان لجوا الاتوبيس أكتر

قاله : يا عم اطفيها بقي

قاله : مش طافيها أنا حر

بقوله : دا أتوبيس واحد

قالي _بلهجة انتي هبلة يا بت _ : دا ميكروباص علي فكرة

بقوله : ممكن حضرتك تنزل تشربها تحت لحد ما العربية تحمل و بعدين أطلع

( مع العلم إن العربية مافيهاش غير 5 أشخاص و في اتنين ستات وراه ولا فتحوا بقهم)

قالي: انتي مالك انتي هتشركيني

قلت له : أنا مش عاوزة أشاركك في السيجارة 

قالي : مش انتي اللي هتجبريني أطفيها اتنيلي أقعدي في اي كرسي

راح السواق قاله يا عم تعالي اقعد جنبي و اخلص

الراجل اللي قدامي قاله : يا عم أفرض في ناس تعبانة مايستحملوش السجائر

قاله: ربنا يشفيهم انا مش طافيها

و طريقة كلامه كلها عنف و هجوم و عِند

أنا مستحملتش و مسكت نفسي بالعافية

بس عيطت و مقدرتش أبطل عياط

نزلت من الاتوبيس

عبدالرحمن و واحد صاحبه كانوا واقفين بعد ما ركبوني

راحوا أتخانقوا معاه

و برده ماطفهاش

أولا : أنا بحس بضعف أوي لما بتخانق مع حد لإني مش بعرف أقل أدبي معاه و مش بعرف أرد و مش بعرف أعمل اللي عاوزاه و اللي هو الصح و الحق للجميع و بالإضافة ان محدش من الناس بيساندني بل بالعكس بيبصولي بأستغراب و كأنهم بيقولوا ايه اللي انتي بتقوليه دا

و بالتالي الشعور دا بيخليني أعيط

ثانيا : أنا اتخانقت علي السجائر و اني مبقدش بستحمل و ممكن في اي لحظة اتخنق و معرفش أخد نفسي و يغمي عليا بعد عناء و الأهم دا حق ليا إني مشمش دخان السجائر زي ما حق له إنه يشربها

عشان كدة قولت له انزل اشربها يغاية ما العربية تمشي و تبقي اركب

ثالثا : أنا نزلت من العربية عشان موقف السواق اللي إنحاز له و أنا مرضتش أنفعه بربع جنيه

الناس يوم عن يوم بتبقي أغبي

و أنا بجد نفسي في عربية صغيرة يادوبك بتمشي كويس

أكرم لي ألف مرة إني يطلع عيني في السواقة في مصر عن إني أركب المواصلات في مصر

يا رب أصلحها بقي و نور اهلها

يا رب

عاشوا في تبات و نبات

بالرغم من كرهي للنهايات السعيدة في الأفلام

اللي بتكون متوقعة و معروفة و مستهلكة 

إلا إني في المسلسلات بتعلق جدا بالأبطال و ببقي بجد عاوزاهم يعيشوا في تبات و نبات و يخلفوا صبيان و بنات

You're Beautiful

http://www.vb.arabspots.com/t5678.html 

المسلسل الكوري  You're Beautiful

مسلسل رائع جدا

يمكن احسن من winter sonata

القصة جديدة و جميلة

و معمولة كويس

و أنا اتعلقت به جدا

و مقدرتش استحمل أتستناه في التلفزيون فحملته علي الكمبيوتر و اتفرجت علي باقي الحلقات

هو فيه اسلوب المنلوج الداخلي المسموع

طبعا دا مش اسم الاسلوب لكن فهمي له

و هو ان الممثل بيقول الكلام اللي بيفكر فيه

كان غريب في البداية لكن اتعودت عليه و بقي احسن بكتير

موضوا المسلسل هو إن (كو مي نام) عضو جديد في فرقة غنائية مشهورة يضطر يسافر للعلاج

من غير ما يمضي العقد مع الفرقة

و سفره يعرضه لطرده من الفرقة و أختيار شخص أخر

فتضطر أخته التوأم (كو مي ناو) تتنكر بداله و تروح تمضي العقد بداله

و لحماية اخوها تضطر انها تقضي شهر مع الفرقة كأنها هو لغاية ما يرجع من السفر

بطله هو اللي هوسني

النوع دا من الشخصيات بيعجبني جدا جدا

هو اه اناني و متعجرف و مش بيعترف بخضوعه للحب أو الاهتمام بأي حد تاني

إلا بطلوع الروح

لكن في الاخر الحب غيره خالص

و طبعا شخصية (شين وو) كانت غتته جدا

كان ممكن يعمل اي حاجة عشان البطلة تحبه

حتي لو كان اسلوب دنيئ و اناني

و لازم طبعا يكون في شخصية زي دي في اي عمل درامي

هو كان طيب جدا و حنون و رقيق و ساعد (كومي نام) كتير 

(جيرمي ) هو الشخصية المرحة اللطيفة في المسلسل

حب (كو مي ناو ) من غير ما حد يأخد باله و محاولش ولا مرة انه يفرض حبه عليها او يصرح به

كان عاوز كل حاجة طبيعي تحبه لوحدها بشخصيته و اسلوبه

و بصراحه هو يتحب مع انه مرح زي الاطفال

لكن وجود شخصية زي دي بتبقي مطلوبة جدا وسط الجماعة

هو تفاحة الموضوع

هو اللي عامل جو حلو بينهم

الحلو في المسلسل انه مجمع الشخصيات كلها اللي لابد من تواجدها في العمل الدرامي

لكن مديها شكل جديد و اسلوب مختلف

مع اهم شئ و هو مبررات الافعال للشخصيات

يعني مش بس بيجيب افعال الشخصية السيئة 

لكن بيوريك هم ازاي بقوا كدة و ليه بيعملوا كدة

و كمان عدم ادراكهم الكامل لافعالهم

يعني هم في بعض لاحيان مش بيقصدوا انهم يعملوا حاجة وحشة لحد

لكن غصب عنهم بمنطق الغاية تبرر الوسيلة

 الموضوع دا عجبني

لاني للأسف بنجذب احيانا للشخصيات الشريرة في الدراما

لما بعرف خليفيتهم و نشأتهم و دوافعهم

بس في المسلسل دا كنت كارهاهم جدا

المسلسل فعلا جميل و يستحق المشاهدة

احداثه سريعة و واضحة و جديدة

مافيهوش الحشو بتاع الدراما عندنا عشان نملي الحلقات و بس

كمان الاخراج تحقة و الإضاءة ممتازة

دا غير طبعا اهم شئ عندي

و هو بداية الحلقة و قفلتها

كل حلقة مصممة كويس جدا بحيث ان اهم مشاهد فيها و أزمة الحلقة

تبقي في نهاية الحلقة حيث الصدمة للمشاهد

و شوق المشاهد انه يعرف ايه اللي هيحصل في الحلقة اللي بعدها

و بداية الحلقة تكتمل الصدمة و تتطور الاحداث اكتر

مش زي خدعة المخرجيين عندنا

يفرقع قنبلة خايبانة في نهاية الحلقة

و لما تتفرج علي اللي بعدها يجيلك خيبة امل و تقول ايه القرف دا

انت عاوز تقفل الحلقة و خلاص علي حاجة ماتستحقش

الموضوع دا بيخليني متفرجش علي المسلسل كله مهما كان

لاني بعتبره اسلوب رخيص في الاخراج و الكتابة

مسلسل انت جميل بجد رائع و يستحق المشاهدة

و الواحد بيتعلم منه من غير ما يضيع وقته

بجد ممتاز

خدني علي بلاد

كلمات اغنية الحدود لمروان خوري


انا بقولها علي لساني


مرات الحدود بتفرق الناس
و تعمر السدود بأيم الوطنية\


مرات الهوية بتغرق الناس ببحور الحروب علي اسم القضية


خدني علي بلاد ما فيها بيارق
ما فيها مداخل و مافيها حراس


ليكي الشجر ورقه ارتمي و غلب هوا تشرين
ليكي القمر ضوي السما و مابيسألك لمين


ضوي انا و سهري انا
وجرح القصب بيدهب
بقلب الناي الحنين

لولاك

لولاك لأصبحت الحياة بلا قوس قزح ، بلا ألوان

بطلت أتضايق

انا بطلت أتضايق من عبدالرحمن
بطلت أتضايق لما يلغي ميعاد أو يتاخر أو يلطعني في البيت لابسة و مستنية يكلمني يقولي انزلي
تفهمت ظروفه اخيرا
مع إني كنت فاهمة و مقدرة ظروفه بس برضه كنت بتضايق
بس الان معرفش ليه بقيت هادية اوي و متفهمة جدا، بحس بس بخيية أمل لإني مبقتش بشوفه كتير وببقي مشتاقة أشوفه
بس من كتر الكلام عن الانفصال و تخيلي لحالتي و حالته لو لا قدر الله حصل دا
خلاني عاقلة اوي
لما بتخيل نفسي بعيط و بشكي لحد و أقوله :
"أنا مش عاوزة حاجة مش عاوزة كل الطلبات الصغيرة اللي طلبتها
مش عاوزة أحط التلاجة في المطبخ و مش مهم مكان البوتاجاز
مش مهم نجيب عفش جديد اصلا و لا مهم ألبس فسان فرح و لا عاوزة شبكة علي مزاجي
ولا اي حاجة أنا بس عاوزة أكون معاه و أعيش جنبه
و مش هزعل حتي لو أتجوز عليا أنا بس عاوزة أكون جنبه"
لما بتخيل انهياري لو انفصلنا و عدم تمكني من تخيل اي صورة لحياتي بعد انهياري مخليني أقول
ايه يعني ماشفتوش ولا اتأخر ولا حتي أروح أستناه بالساعات و مايجيش
مش مشكلة كفاية إني قادرة أكلمه و أقوله وحشتني
أنا مش زعلانة
بجد أنا مبسوطة اوي من العقل اللي نزل عليا دا
و مش متضايقة خالص من حاجة لإني فاهمة كويس أنه مش بإيده يتاخر ودائما بيكون غصب عنه
حتي لو مش غصب عنه
أنا مش متضايقه
كفاية إنه جنبي معايا
و بيكمني يقولي أنا اسف مقدرتش اجي
بحبك

مش عاوزة اشتغل

مش عاوزة اشتغل شغل نظامي
اصحي في ميعاد محدد و اروح في ميعاد محدد متاخر
انا عاوزة اشتغل شغل مواسم
مش عاوزة اربط نفسي بشغل روتيني طول السنة
حتي لو كان الشغل دا مش روتيني
انا عاوزة اقعد في البيت
و في نفس الوقت مابقاش قاعدة و بس
عاوزة اتبرع في جمعية رسالة
دي من احسن الحاجات ليا

ابيض و اسود

الحياة بقت ابيض و اسود

بحبك

بحبك

سرقة الضائع

هو ليه مبقاش في ناس ولاد حلال خلاص
يعني اي حد يضيع تليفونة مافيش نص ساعة و يتقل و مايسمعش عنه خبر
خلاص ولاد الحلال اللي بيرجعوا التليفون لصحابه خلصوا
احنا مرة لقينا تليون و لما كلمنا صحبته و جت تأخده كانت عاوزة تدينا فلوس
و استغربت اوي اننا رجعناه لها قبل ما تقول شكرا


خلاص ولاد الحلا خلصوا و لا ايه؟؟؟؟

اغنية حين اغني

ريما خشيش
حين اغني



لاني ظلال غنائي اغني 
فحين صرخت احبك كنت اغني
و حين همست احبني كنت اغني
و حين خلقنا و حين عشقنا
و حين احترقنا و حين افترقنا
و حين استرقنا رداء الطفولة
كنت اغني
لانك لحن غنائي اغني

لاني ظلال غنائي اغني
لاني أراقص طيفك حين اغني
و اسمع همس عبيرك حين اغني
لانك مني تخالط عني
و تدفع عني جنون التمني
لانك تطوي عذاب المسافة
حين اغني
لاني كرهت بكائي اغني
اغني

كلام عن الانفصال

إنت بتتكلم كتير اوي اوي عن احتمالية انفصالنا
انا عارفة ان احنا ممكن ننفصل في اي وقت
و ان ممكن تحصل ظروف تبعدنا
او اهالينا تتخانق و تمسك في بعضها و الموضوع يبوظ غصب عننا
بس كتر الكلام في الموضوع مؤخرا مخوفني جدا
و طالما انت حاطط حاجة في دماغك يبقي هتحصل
الواحد المفروض يركز علي الايجابية مش السلبية

ربنا عند حسن ظننا به
لو ركزنا علي ان ربنا ان شاء الله يجمعنا و مايفرقناش ابدا
و نعيش علي حبه و حلاله و رضاه
مش ممكن حاجة تحصل تخلينا ننفصل
لكن لما نفضل نحط في الحسبان انفصالنا
عشان الواحد مايتصدمش ساعتها
هو دا اللي هيحصل

انا بحب افضل متفائلة
و النبي بطل كلام عن انفصالنا

طلاب قسم اللغة العربية

بابا قعد 3 أيام يقنع فيا إني أحول من قسم إجتماع إلي قسم اللغة العربية
في الاول كان ردي لأ قطعاً
صليت قلاة استخارة و روحت اول يوم
حضرت اول محاضرة _الي الدكتور ماجاش فيها_ مع طلبة إجتماع
بصيت علي "سوق الخضار " حوليا و مندوبي المكاتب بيسوقوا لمرازم مكاتبهم
و الطالبات أغلبهم جاية تتجوز
و الطلاب جايين يفضوا دماغهم من وجع المذاكرة و يذاكروا أخر شهر
و يضبطوا بنات طول السنة
قعدت أقل من ساعة تقريبا
مسبهلة و خائفة و منكمشة علي نفسي
و بقول :
يا نهار أسود انا هعيش مع الناس دي أربع سنين
كنت حاسة أني بنزل لتحت مش بطلع لفوق
روحت أحضر محاضرة مع قسم عربي
و لقيت عدد قليل من الطلبة فقط
ناس رصينة، نقاشات جدية،و حتي طريقة لبسهم و كلامهم و نظارتهم
قولت هو دا المكان اللي عاوزاه
أنا عاوزة اطلع لفوق ، عاوزة أكبر عاوزة افهم عاوزة أتثقف
مع إني فاشلة في العربي 
(و تقريبا مازلت)
بس قولت لازم احاول ، لازم اطلع و لو سلمة واحدة لوحدي


بعدها حاولت اتعرف علي ناس
ناس تمسك ايدي و تشدني لفوق
لاني دائما بحتاج حد يرشدني و يشدني 


مع أني متعلتش كتير اوي لاني بنسي بسرعة خرافية
و مع إني محاولتش محاولة جدية إني اثقف نفسي و اقرأ اكثر
لإني بجد مش بقدر اقرأ غير القصص و الروايات


لكن حاسة إني مختلفة عن الاول بكتير
بقيت شخص تاني
واعي أكثر و فاهم أكثر 
أو بمعني أصح
عندي القدرة إني افهم و استوعب كويس


حاليا بحاول اقرأ الاخبار
و دا موضوع تقيل أوي علي نفسي
أنا بحب أسمع الاخبار من حد
مش من نشرة الأخبار
لكن من حد يحكي و يقولي الملخص المفيد اللي يوصل لإدراكي كويس


أنا بحاول
بس ساعات الظروف اللي الواحد عايش فيها بتخليه مخنوق و مش عاوز يعمل اي حاجة


بس أحسن حاجة
اني أسمع حد يقول: أنا مش بعرف اتكلم مع طلاب قسم عربي زيكم كدة
كلكم بتتكلموا بأسلوب معين و تفضلوا تحكوا قصص كدليل علي الكلام
كل حاجة عندكم ليها دليل من كتاب او من قصة
و تفضلوا تحكوا و تشرحوا


و بابا دائما لما يقولي حاجة، نختلف علي فهمها
هو يقولي مثلا مش كل الامور زي بعضها، بتختلف
و انا أقوله لأ
لازم كلامك يكون محدد
هو ايه اللي بيختلف عن ايه و كل حاجة ليها قاعدة و استثناء
و طبعا الناس العادية مش بتتكلم كدة


بس دا بيفرحني
مع إني مش طالبة كويسة
و مع إني مش بفهم في العربي كويس ولا نجحت السنة دي
بس بفرح لما حد يقولي:
أنتم يا بتوع العربي مش بتعرفوا تتكلموا غلا مع اللي زيكم
بحسن إني من طلاب قسم عربي
الفاهمين العاقلين اللي عاوزين كل حاجة في الدنيا تكون مضبوطة
أنا فخورة إني دخلت القسم دا

( حتي لو بيتقال عليه قسم الأرياف)

:) :)

التاكسي في مصر

زمان

كان التاكسي بيتحاشي بشتي الوسائل الطرق الزحمة و الواقفة و الاشارات

لان كان متعارف ان المشوار له ثمن معين

مهما وقف او كان الطريق زحمة او مشي من طريق طويل

المشوار دا ثمنه مثلا 3 جنيه انت بقي مشيت من طريق طويل دي مشكلتك مش مشكلتي

و طبعا كان في خناقات

بس بسيطة

لكن الان

التاكسي الابيض احسن تاكسي ممكن الواحد يركبه

لكن

السواق

اغلب اللي ركبت معاهم كويسين

لكن قلة منهم (زبالة)

لو الطريق فاضي

يمشي من اطول طريق دا غير انه بدل ما يدخل يمين يدخل شمال و يلف

ام الاستعباط

عشان العداد يعد

او انه يتكيف اوي من الزحمة

و اقوله ادخل يمين في الشارع دا

يقولي دي اشارة و هتفتح الان

و العداد بيعد

سواقين عاوزين كسر عربياتهم

و يا ريت كل واحد عاوز يعمل الحركة الزبالة دي

يركب تاكسي اسود و يخلص دماغه

و يبقي يقول هو عاوز كام في المشوار من الاول

بدل شغل العيال دا

اسفة يا حسن

بالرغم من غضبي الشديد اني السبب في ضياع اجازة حسن الصغيرة جدا
لاضراره الشغل بدالي في المصنع
إلا اننني بجد مش قادرة ة اروح و مش عاوزة باي حال من الاحوال اني اروح
اسفة يا حسن
انت بجد حسن و احسن حاجة في البيت دا
بس انا مش قادرة بجد اساعدك
ربنا يعينك و يعوضك يا رب

عاوزة اخرج

عاوزة اخرج معاك جدا
خلاص اتخنقت
عاوزة اخرج

دور علي السعادة

السعادة تلاقيها في سباق صديقين علي سلالم المترو
السعادة في الهواء البارد اللي يخبط وشك من شباك المكروباص في نص شهر نوفمبر
السعادة في ضحكة طفل لما تغمز له
السعادة تلاقيها في طعم الايس كريم في عز الثلج
دور علي السعادة لما تلاقي الدنيا ضلمت
ممكن تلاقي السعادة في صوت الغسالة المزعج اللي يخليك تفضل قاعد في الحمام
بس عشان ماتسمعش الخناق اللي برا

و بالاخص
السعادة تتجلي لما تبقي مهموم و مخنوق و تقلب في التليفزيون
تلاقي فيلم
(في شقة مصر الجديدة )
او
(under the tuscan sun)
و ينعشك من جديد

السعادة في الحاجات الصغيرة
السعادة مش محتاجة فلوس ولا فسحة كبيرة ولا زحمة الافكار الحلوة
لو عاوز تبقي سعيد
هتبقي سعيد

مدونة فانتازيا

فانتازيا
اعظم مدونة قريتها علي الاطلاق
كاتبها ماشي الطريق
كتاباته طالعة من القلب
طبيعية نقية صافية
 و من غير مبالغة
خاصة بوست نرمين
احلي بوست في المدونة
كل مرة اقرأه فيها اعيط
و انفعل و اتفاجأ كأني بقرأه لاول مرة
المدونة كلها علي بعضها تشدك انك تقرأها مرة و اتنين و عشر مرات كمان
بقاله سنتين مش بيكتب
الاسباب غامضة
بس منطقية
بقالي سنتين مستنياه يكتب
كلام من القلب
يوصل الي القلب

شكرا يا محمود
كنت بلاقي بوست ليك لكل حالة بمر بيها
شكرا

رجال لا يصح تسميتهم برجال

مش قادرة افهم ليه الستات مبسوطين لما الرجالة بتركب عربة السيدات فقط في المترو
وة كمل لما اتكلم
الراجل يبجح فيا و يقولي انتي مالك و مش انتي نازلة
و الحجة ايه!!!!!!!!!!!
العربيات التانية زحمة!!!!
او راكب مع مراتي انتي مالك!!!!!!!!
اللي خايف علي مراته "من عربة السيدات " يأخذها تركب معاه
يقولك ما انتي بتركبوا عربة الرجالة
اوعدك يا خفيف لما يتكتب عليها للرجال فقط مش هتركب السيدات
دا احنا لينا عربية واحدة بس
و طبعا كل ما اتكلم مافيش واحدة بس من اليدات يتكلموا


من اسبوع شوفت موقف عجبني اوي و ناوية اعمل زييه ان شاء الله
و علي و علي اعدائي بقي
اول ما ركبت كان في حوالي 7 رجالة راكبين
لقيت بنتين بيتكلموا روحت وقفت اتكلمت معاهم
و حاولنا ننزل الرجالة
و لما حد يرضي و يرد عليا
تقول مراته انتي بتوجهيله الكلام ليه!!!
لو مش عاجبك روحي اركبي معاه
لقيت ناس تانية في اخر العربة بيتكلموا روحت معاهم
و فجأة
لقيت واحدة اول ما دخلت زعقت محدش رد من الرجالة راحت ماسكة باب المترو قبل ما يقفل و حلفت ما هتسيبه الا لما الرجالة ينزلوا
النتاس اتجمعت و انا و بنت تانية وقفنا معاها
و الغريبة
انها وقفت حوالي دقيقتين ماسكاه و المترو وقف
و الستات بيقولوا ايه
اللي انتي بتعمليه دا غلط!!!!!!!!!!!!!!
غلط ايه يا هبلة
هم اللي غلط
و انا قلت لها انا مستعدة ادفع غرامة العطلة دي بس الرجالة ينزلوا
حرام عليهم يا اللي محسوبين علي الرجالة عدد و بس
دي هي عربية واحدة لينا


واحدة عاوزة تعدل هدومها
او ترضع ابنها
او حتي تعدل مكياجها
سيبولنا خصوصية بقي
مش كفاية محللين العربية التانية ليكم من اول النهار مش من بعد 9 مساءً


يا ريت كل الستات تتكلم معايا لما احاول اخرج الرجالة
و يا ريت حد يقف جنبي لما امسك الباب
ما لما محدش بيتكلم بسكت
الراجل بيبجح فيا و محدش واقف جنبي
بل بالعكس
بيبصوا لي باستغراب شديد


علي فكرة
في رجالة بيسرقوا من عربة السيدات
و في سيدات اتجروا و رفعوا عليهم مطاوي


ان شاء الله مش هسكت تاني بس لان محدش وقف جنبي
و همسك الباب و مش هسيبه الا لما ينزلوا كلهم
يا رب اقف جنبي

حالتي الصحية

حالتي الصحية بقت سيئة جدا جدا
لدرجة ان الدكاترة بيقولوا لي كفاية يا بنتي حرام عليكي نفسك 
ابعدي عن كل اللي عاملك كدة
و طبعا مافيش ابتعاد الا بحل واحد لم يحن وقته بعد
و ارجوا ان يحين وقته في اسرع وقت
حتي لو الاسبوع الجاي
بس انا وصلت لمرحلة وحشة اوي
صحيا و نفسيا و اجتماعيا
مش عاوزة اعمل حاجة في اي حاجة
بغض النظر عن اني مش قادرة
بس بقيت حتي مش عاوزة اتكلم في التليفون الا مع عبدالرحمن
مش عاوزة اسمع و اتكلم و احكي من اول و جديد
نفسي اكلم صحابي و ارغي معاهم
نفسي اقابلهم
نفسي اكلم ميران و هاجر و منه و نورا و نورهان و سارة و رنا و نورهان و ايمان
بس مش عاوزة
نفسي اتقفلت عن كل حاجة
دا انا حتي بقيت بزهق من مسكة الريموت و التقليب في القنوات لغاية ما الاقي حاجة اتفرج عليها كويسة
دا ساعات ببقي مش عاوزة اقوم اشرب
بقت حالتي وحشة اوي
بس بزعق لنفسي و ازق نفسي بالعافية اني اكون احسن
عاوزة ابقي احسن
عاوزة ابدأ حياتي بجد
عاوزة اطلع من بطن امي

هتمناله الخير ، انغام

جميل ان الواحد ينهي العلاقة بشياكة و مايفضلش يطلع في الوحش و يقول و يعيد
بس ان الواحد يفتكر الحلو بس و ينسي الوحش دا يخليه يفضل يحب الشخص الاخر و مايعرفش ينساه و يتعذب بحبه و بعده عنه
من رأيي اننا نفتكر الاتنين و نحاول نقول لا الوحش خلي الحلو مجرد ذكري لكن انا مش هحن للشخص دا
مع اني لو في الموقف دا لا قدر الله مش هعمل كدة
و الحو هيخطي علي الوحش بكتيييييييييييييير و هتمسك بالحب و عذابه
بس دا رأيي في اي حالة تانية

اغنية هتمناله الخير لأنغام 

انكشف الستار

و انهار الستار الآلاهي عنك
و انهزمت الاسطورة
يا ليتك مت قبل ان اراك هكذا

freedom writers

فيلم في غاية الروعة
بيتكلم عن مدرسة تدرس لاول مرة لطلاب من عناصر مختلفة
ابيض و اسود و اسيوي و اجنبي
المدرسة باكملها مصنفة حسب العرق
بس هي قدرت توحد طلاب الفصل بتاعها
من خلال مشاركتهم الهموم و المشاكل
قالت كلهم خايفين من بعض
كلكم خسرتم حد من المعارف و العائلة بسبب حرب العصابات
كل واحد بيدافع عن مجموعته حتي لو كان ظالم
خلتهم يواجهوا الدنيا من غير خوف
فهمتهم انهم مايسمحوش حد يقولهم هم يقدروا يعملوا ايه و ايه مايقدروش يعملوه
محدش له الحق في دا
انت لو عاوز حاجة هتعملها
خلتهم ينجحوا
خليتهم يتصاحبوا و يسلموا علي بعض قدام الناس
فيلم رائع عن العنصرية و الشعوبية
كل واحد منضم لشعبه و واقف جنبه و خايف من الباقي
السود خايفين من البيض لانهم اقوي و يقدروا يعملوا كل حاجة
و البيض خايفين من السود بسبب عنفهم و اجرامهم
محدش فكر ان هو اللي دفع الاخر لكرهه
طبعا بغض النظر عن ملاحظة دمار المجتمع الامريكي و عنفه و عنصريته مهما كان في اعلان لعدم وجود العنصرية دي
بس حتي الافلام اللي بينقوا ايه منها نشوفه
بتبين مدي انعدام الامان في المجتمع الامريكي
الافلام دي بتخلي الواحد يقول الحمد لله كل ما يتفرج عليها
قد ايه احنا في امان
قد ايه احنا كلنا ايد واحدة حتي لو كان في مشاكل
بس علي الاقل دماغنا مش بتمسك في لون بشرة الواحد و تحدد مكانته و التعامل معا علي اساس دا
كل واحد بافعاله هيتم التعامل معاه
فيلم freedom writers يستحق المشاهدة بجد

غير قابلة للمواساة

يخرب بيت الخرس اللي بيجيلي لما بتشتكي او تفضفض عن همك
و الله يا حبيبي معرفش بيجرالي ايه
بس اي كلام بقوله مش بيعجبك
و بيخليك تقفل السماعة
و اي تهوين للموضوع بيغيظك اكتر
مع انك انت نفسك اكتر واحد بتهون علي الناس
و تخليهم يتقبلوا الموقف
و الله معرفش ليه بسكت
بس انا جربت كل حاجة اقدر اعملها
و انت بترفضها كلها
اغير الموضوع تقول انا مش حاسة باهمية الموضوع
اهون تقولي دا استعباط مش المفروض نهون الموضوع
احاول اقولك خلاص الدنيا بايظة بايظة تعامل معاها و ماتبوظهاش اكتر
تقولي ايه العبط دا
احاول الاقي حلول و اقولك بس لنص الكباية المليان
تقولي مش بحب ابص لنص الكباية المبلول بتاعك دا
حتي كلمة معلش و ربنا هيفرجها مش بتريحك
طب اعمل ايه

بسكت


اسفة حبيبي
بس مش عارفة اقول ايه بجد

انا مكسورة جدا جدا

انا زعلانة منهم كلهم


و مكسورة جدا جدا


حرام عليكم

اقف جنبي يا رب

حرام عليك

حرام عليك بقي

سيبلي حاجة اخترها

حاجة تافهمة مالهاش لازم مش هتسببلك اي مشكلة ولا حتي منفعة

حاجة بسيطة

سيبلي حاجة اخترها بقي

انتخابات اتحاد الطلبة لكلية الآداب جامعة القاهرة 2011

النهاردة في كلية الاداب شهدت بنفسي اعتدادات الاخوان علي مرشحين الثورة


في إعادة للانتخابات اليوم الاحد 27/3/2011
دخل مرشح من الاخوان المسلمين اللجنة


و دا ممنوع تبعا للقانون
حاول الطلاب و المرشحين الاخرين من مرشحي ثورة 25 يناير انه يطلب منه الخروج
رفض و قالهم ( انتم مالكم) انا بحرس الصندوق!!!!!


دخل واحد  في الحوار و هو رجل قدير و كبير في السن و هو صديق للطلاب و شاعر و ناقد
كان بيساند الطلاب و معاهم خطوة بخطوة


حاول يفهمه ان دا ممنوع و دا ممكن يبطل الانتخابات
قاله ( بس يا كابتن انت خليك في حالك و مالكش دعوة)


و بدأ الضرب


و الاخوان جم من دار علوم و تجارة و كليات اخري
و ضرب في الكل


لدرجة ان في واحد من شباب الثورة أصيب و راح المستشفي


و طبعا للي مش فاهم الاخوان و اساليبهم
قال شباب الثورة بيضرب في الاخوان


و الاخوان شغالين استفزاز في الشباب
و الضرب وصل للضرب بالعصي الخشب


و انتشرت اشاعة غبية و الكل صدقها من جهله


ان احد شباب الثورة سب احد الاخوان و تعرض لاهله في السب
و الكل صدق من غير ما يسأل

و الخبر اللي هم نشروه علي الموقع بتاعهم من ضمن الاشاعات
http://www.ikhwanonline.com/new/Article.aspx?SecID=304&ArtID=81441


و محدش عرف ايه اللي حصل في الانتخابات الاولي


لما كان الاخوان بيقفوا علي الباب و يقولوا للمنتخبين ان قائمة شباب الثورة اتغيرت و يشطبوا علي الاسماء اللي معاهم في الورقة و يكتبوا اي اسم
عشان يبطلوا صوته في الانتخابات


دا غير ان الدكتور المشرف علي الانتخابات من الاخوان
و امر بفتح الصناديق و فرز الاصوات و العمل بها مع ان النصاب لم يتم
و هو ان 20% من طلاب الجامعة ينتخبوا
و دا قانونا غطأ
بل في الحالة دي يتم تعيين اتحاد الطلبة من قبل الكلية
و يتم تعيينهم حسب من كانوا لهم نشاط قبل ذلك ومن اوائل الدفعات
و طبعا الاخوان كانوا ممنوعين من مزاولة اي نشاط قبل ذلك
و مش من مصلحتهم ان يتم التعيين من الكلية
هي دي النزاهة برضه

فيلم في شقة مصر الجديدة

فيلم في شقة مصر الجديدة
قصة وسام سليمان
و اخراج المخرج العبقري محمد خان

كان الاختيار موفق جدا لابطاله
 هما غادة عادل و خالد ابو النجا


الفيلم اكثر من رائع
اتفرجت عليه ما لا يقل عن 10 مرات
و عمري ما همل منه


انا هتكلم عن تحليلي و وجهة نظري الخاصة جدا
انا بعشق الفن
خصوصا السينما و المسلسلات الاجنبي
لكن لما تكون كويسة
بحب الفن بحب إجادة الفن
الفيلم ممتاز و متقن الي ابعد درجة و مافيهوش غلطة من وجهة نظري


اولا القصة
القصة عبارة عن نظرة خاطفة عن مرحلة معينة في حياة البطلة
و دا اساس القصة القصيرة
انها لقطة من الحياة
لا يحكمها إلزام وجود بداية و صراع ثم النهاية
و إن وجدت لا يكون خطأ
لكن مش لازم يعني نعمل حكاية كبيرة و عريضة 
غالبا دا لو ماكنش دائما تكون نهايتها نهاية سعيدة 
يغلبها نجاح قصة حب بدأت في الاحداث

احلي حاجة في فيلم في شقة مصر الجديدة
ان القصة كأنها واحد راقب نجوي و هي مسافرة و صورها لغاية ما ركبت القطر تاني عشان ترجع بلدها
لمحة من حياتها
حصلت احداث مهمة جدا في الفترة الزمنية القصيرة دي
و دا اللي بيميز القصة القصيرة او دا اهمها
و هو وجود تغير في حياة البطل يجعل هذه اللحظة مميزة و تستحق ان تُذكر
و التغير دا إنها وجدت الحب اللي كانت بتحلم بيه
و الاهم من دا يكتير
هو إنها اكتشفت اخيرا مدي صحة الكلام اللي قالتهولها أبلة تهاني
عاشت طول عمرها بتؤمن بشئ لكن خايفة يطلع غلط
خايفة تطلع حياتها كلها كذبة
خايفة تكتشف بعد فوات الاوان انها ضيعت حياتها لأنها صدقت بشئ و تمسكت بيه
و يمكن دا يكون اهم حاجة في رحلتها للبحث عن أبلة تهاني
كانت اه عاوزة تطمن عليها
لكن الاهم
انها كانت عاوزة تسألها إنتي خدعتينا ولا مصدقة بجد اللي انتي بتقوليه
اهمية اللمحة او القصة القصيرة دي انها كانت محور تغير في حياتها
لو كانت اتجوزت العريس اللي جالها كانت هتعيش طول عمرها تسأل نفسها انا غلطت ولا لا
و دي تبقي مصيبة
تتجوز عشان ترضي اهلها و المجتمع
و هي مش حابهاه و مش مقتنعة بيه اصلا


ثانيا الاخراج
الاستاذ محمد خان اخرج الفيلم بصورة رائعة
اتقن توجيهه للممثلين 
و خلاهم يتقنوا تعبيرات الوجه و انفعلاتها
انا كنت حاسة ان حتي عيونهم بتمثل

و دا مهم جدا
لان مافيش مونولوج داخلي في الفيلم
في مشاهد كتير اعتمدت علي تعبيرات الوجه
بالضبط زي ما قولت كأن في واحد ماشي ورا نجوي و بيصورها
مش بيمثلوا فيلم
كان الفيلم حقيقي مش تمثيل
الإضاءة كانت تحفة و متميزة جدا
المشاهد مافيهاش مشهد مالوش لزمة
الفيلم كله مافيهوش لقطة واحدة بس مالهاش لزمة او يمكن الاستغناء عنها
و مافيش ولا مشهد واحد تحس انه كان ممكن يتعمل مختصر
مافيش مشهد حشو علي الفاضي


فيلم متقن الي ابعد درجة
كعادة محمد خان




بصراحة
انا مؤمنة جدا بكلام ابلة تهاني
و هو حقيقي عن تجربية
انا قابلت عبدالرحمن في ظروف عجيبة
لما بنراجع مسار حياتنا
بنكتشف اننا مكنش ممكن اننا نتقابل
الانسان اللي في خيالي كان هو بالضبط
و احسن كمان من خيالي
هو الشخص اللي مكنتش متخيلة اني ممكن الاقيه
و مكنتش متخيلة ان ممكن يكون في حد بالمواصفات اللي في بالي
ربنا يخيه ليا و يباركلنا في حبنا
الحب هييجي في وقت غريب
ممكن تحس فيه انه جه في وقت غلط
الحب هييجي من غير ما تدور عليه
و كل ما تدور
هيضيع منك اكتر
هتلاقي نفسك بتحب شخص مكنش ممكن تتخيل انك تحبه
هتلاقي نفسك قوية
بتحارب اقرب الناس ليك عشانه
طبعا في الاول هيكون في شك
و خوف من الفشل
و قلق و كل الحاجات اللي بتلخبط العلاقة في الاول
بس استفتي قلبك و عقلك
لو حسيت انك مش هتعرف تعيش من غير الشخص دا
اتأكد ان دا هو الحب الوحيد اللي مش ممكن تلاقي زييه
و ساعتها
هتبقي قوي و هتحارب الدنيا كلها
المهم انك متخليش حد يأثر علي قرارك




شكرا يا استاذ محمد خان علي الفيلم


و اخيرا اهم حاجة في الفيلم و اللي مخلياني استمتع كل مرة بالفيلم
هي النهاية
يا الله علي النهاية
احسن نهاية ممكن تتعمل للفيلم
نهاية مفتوحة
مضبوطة و متقنة تماما و واقعية 100%
و القفل اللي في الاخر
و هي بتقفل عنيها و بتكرر رقم التليفون
كأنها بتحفره في عقلها و قلبها
مش مسكت التليفون و سجلته فيه
لكن سجلته في حقلها و في قلبها


احسن نهاية علي الاطلاق

لما تكبري هتنضجي!!!

عزيزي بابا
انت كنت رافض عبدالرحمن
و كنت دائما تحاول تقنعني اني لسه صغيرة و لسه سنة اولي جامعة و سنة اولي حياة
و سنة اولي مسئولية و سنة اولي وعي و ادراك
و دائما و ابدا كنت تقول ان علي سنة رابعة
ممكن دا لو مش اكيد اني هغير رأييتماما في عبدالرحمن
و اني هبصله بنظرة مختلفة
و هلاحظ انه بيستغل برائتي او حاببها عشان يحط افكاره هو
و يخليني احبه و انه عاوز واحدة بيضاء لسه محدش كتب علي دماغها حاجة
و كنت واثق جدا من كلامك
و بجد كلامك هزني
و خلاني السنة اللي فاتت اعمل العملة المنيلة اللي عملتها
و هبقي اقول عليها بعدين

بس انت كنت غلطان
كل يوم يعدي عليا
اتأكد ان عبدالرحمن هو الشخص الوحيد اللي ينفع لي
هو الشخص الوحيد اللي حبيته
و اللي عمري ما هحب حد غيره
و هو احسن انسان ممكن اعرفه في حياتي كلها
و هو بجد  انسان كويس
و بالفعل
هو استغل برائتي و صفحة دماغي البيضاء
و كتب عليها
كتب عليها اهم جملة
انت يا بابا معرفتش تكتبها
انت يا بابا كتبت
(اسمعي كلامي انا عارف احسن منك و مجرب و طاحن الحياة)
كلامك كان صح
بس مكنش صح انك تكتب في صفحتي الوحيدة كدة
الصح
اللي كتبه عبدالرحمن
و مسح جملتك
و كتب بالحبر جملة مهمة
استغل فيها برائتي و بياض صفحتي
و كتب


(انتي اصنعي قرارك من كل اللي بيتقال حواليكي
انتي شخصيتك هي اللي بتقرر مش الصح اللي المفروض يتعمل
الصح و الغلط نسبي
لكن انت عندك اخلاقك و مبادئك و خبرتك الصغيرة عن الصح و الغلط
حبيبتي
انا عاوزك تكوني رأيك بنفسك مش مني ولا من ابوكي
لكن عاوزة لوحدك من غير ما حد يقودك
و انا جنبك
مش قدامك)


حبيبي
انت اعظم انسان

الزوجة الثانية

قريت في مدونة بت خيخة و اي كلام
القصة الرائعة دي
زوجتي العزيزة




و كانت تحفة


في الاول كنت متضايقة من الزوجة
و تعاطفت معاه
بس لو كان قالها و نبهها للحاجات اللي مش بيحبها كان هيبقي احسن
و كان يبقي عمل اللي عليه


و هي لو بتحبه بجد مكنتش عملت  كدة
و اللي هيقولي وراها مسئوليات و مش فاضية والبيت كله عليها
هديله في سنانه
انا مجربه و عارفة
لو تفكر شوية و تنظم وقتها و تنظم بيتها
و بتطل اهمال
كانت حياتها اختلفت جدا
بس هي تحولت لامرأه مصرية اصيلة
اللي تصبح ام غاضبة و متعصبة طول الوقت
و طباخة
و غير زوجة
و غير صديقة
و غير حبيبة لزوجها
الزوج عنده حق
و مغلطتش
دا راح اتجوز واحدة تانية
مع بقاءه علي الاولي
و حبه لها كمان مانتهاش
بالعكس
دا اتجوز واحدة عكسها
عشان هم الاتنين يكملوا بعض


في نص القصة
زعلت جدا من الزوجة الاولي
لانها طلعت مش اصيلة
و طلعت سلبياته و غلطاته للناس
و دي لوحدها حرقة تستاهل الطلاق
لانها مشس امينة علي بيته و اسراره
و لا امينه علي جوزها و اسراره
ولا تنفع يتعاش معاها اصلا


زعلت اوي لما طلق التانية
كان نفسي يطلق الاولي لانها تستاهل
بدل ما تعدل من نفسها و تصلح الي مش بيحبه فيها
طينت الدنيا و خربت بيتها


طبعا خربت بيتها
لانها هتعيش مع راجل تعيس
مش قادر يبقي سعيد معاها او يسعدها
و مش بيحترمها
و مش بيثق فيها
و باقي عليها بس عشان العيال
حتي شوية الحب اللي كان ليكي
ضيعتيه يا غبيه
سيدة مصرية اصيلة


طبعا كدة فرحت و اتنعنشت


الزوجة التانية هي الزوجة بجد
الذكية اللي بتعرف تحافظ علي جوزها
اللي تصونه و تحافظ علي بيتها


بصراحة
لو جوزي هيتجوز واحدة زي دي
هحبها و اشكرها لانها عرفت تخليه سعيد
و هصاحبها و بتبقي بيت واحد مش بيتين
و اسرة واحدة
اه غيرانه و متضايقة و زعلانه من نفسي و منه
لانه منبهنيش كويس لغلطاتي
بس لو كان عمل و قالي مرة و اتنين و تلاتة
و انا اللي مش بنفذ
يبقي حقه
 و اشجعه كمان
بس يقولي قبل ما يتجوز
ها

سعيدة

حبيبي
انا سعيدة جدا معاك
حتي و انا متخانقين
بفضل افكر فيك
و افكر ازاي احاول اصالحك او اسعدك
لما ببقي متضايقة منك و مش عاوزة اكلمك
باعمل اكلة و اقول في سري انا هبقي اعملها لحبيبي
انا سعيدة


هو اه علاقتنا متوترة جدا
و فيها مشاكل الدنيا كلها
و يا عيني عليك ماشوفت معايا عيد حلو
حتي العيد الوحيد اللي متخنقناش فيه
بوظت انا فرحته
لكن انا سعيدة
لاننا عرفنا نعدي كل المشاكل دي
و عرفنا نتواصل و نعدي السدود اللي كل شوية تتبني
حتي السدود اللي بنبنيها بادينا
بتعرف تكسرها
و علمتني ازاي اكسرها


بحبك

اتخضيت

اخيرا خضيتك و لو لمرة واحدة
علي فكرة انا كنت محضرة كلام كتييييييير اوي
 و اسباب كتير للزعل منك
لطعتني اربع ساعات
 و نزلت متأخر من البيت عشان اخد الورق
و مذاكرتش يومين و ضاعوا علي الفاضي
و قدامي 3 ايام بس اذاكر فيهم
بصراحة انا زعلانة منك في الحكاية دي
و اثبتلك اني اقدر اعمل ايس كاب في يوم واحد
هو اه واسع
بس انت اللي مش عاوز تقيس راسك 
و كنت محضرة محاضرة طويلة عريضة في الزعيق و الخناق و في الاصور و احترام المواعيد
و احترام امتحاني و انك لازم تساعدني في المذاكرة مش تعطلني
و اول ما شوفتك
نسيييييييييت كل حاجة
و اتكلمت بالعافية
بس كنت متضايقة جداااا ان الطاقية واسعة
انا اه مش عارفة هضيقها ازاي
بس هحاول
و ربنا يوفقني

شكلط و انت بتضحك لما عرفت اني بمثل عليك الزعل
كان تحفة
كنت سعيدة جدا جدا
و فرحت انت ذوقت اللي بتعمله فيا
عشان تعرف بس
انا لما بحط حاجة في دماغي
بعملها
و مش مسموح لحد انه يقلل من مهاراتي اليدوية
هاهاها
و غلبتك

كروشيه

مشتاقة للكروشيه اوي
وحشني جدا
احساس جميل جدا  انك تعمل حاجة بأيدك
و تلبسها و تمشي فرحان بيها
حتي لو مش حلوة او مش متقنة

انا عملت شنطة صغنونة قبل كدة
و كل الناس مش مصدقين اني انا اللي عاملاها
و بيقولوا جايباها بكام
و اعمليلي واحدة


احساس رائع
زي احساس النجاح

برميل الامتحانات

سبحان الله
الواحد يفضل طول السنة يفهم المذاكرة بالعافية
(دا لو ذاكر اصلا)
و يحاول يفتح في مواسير دماغه
و هي مسدودة و حالفة ما تفتح
و فجأة قبل الامتحانات بأسبوع تقريبا
تحس ان في برميل في دماغك اتفتح مالهوش قرار
و تقدر تحشي المعلومات فيه بكل سهولة
بس المرة دي
البرميل مش عاوز يفتح

فاكر السنة اللي فاتت لما فضلنا نحضر محاضرات النقد
و نحاول نقرأ الكتاب
و نجيب تلخيصات من زمايلنا اللي بيذاكروا
و برده مفهمناش حاجة
المادة تقيلة جدا و عاوزة تركيز عالي و دماغ متفتحة شوية
و جيت في الثلاث ايام قبل الامتحان و طبعا الكل بيذاكر من التلخيص و الملزمة
و انت تقولي
ماتستعبطيش و سيبي الكتاب
حاولت افهم الملزمة بس ازاي هكتب و انا مش فاهمة
ما التلخيص دا لازم يتخفظ
حاولت افتح الكتاب و اقرأه
و سبحان الله عقلي استوعب الكلام من اول مرة
و لاول مرة اكتشف عبقرية الراجل دا
و احنا مش حاسين بقيمته خالص بقلنا 3 سنين
احنا عارفين قمته لكن مش حاسين بيها
و سبت المكتب و قعدت في الصالة قدام التلفزيون اقرأ الكتاب
و اقول الله الله الراجل دا عبقري
الله الراجل دا دماغه عالية اوي
ربنا يباركله في صحته و علمه
و بابا ساعتها يضحك و يقولي ايه يا هبلة انتي اتجننتي
و اقوله دا عبقري
ساعتها سألني طب الكلام دا هتكتبيه في الامتحان يعني
يعني هتعرفي تحلي
اضحك و اقوله لأ
بس الكتاب حلو اوي
طب قومي ذاكري كويس
اقوله انا مصدقتش افهم كلامه
و انت ساعتها زعلتني اوي فضلت تزعق فيا و تشخط
و تقولي اني هبلة و عبيطة و بستعبط
و الامتحان بكرة سيبي الكتاب و ذاكري كويس
و فضلت اقنع فيكم كلكم
الدكتور زهق مننا و قال بالنص
نفسي اشوف حد فيكم بيكتب من الكتاب بتاعي او من اي كتاب
الكل بيكتب من الملزمة عشان كدة بتشيلم المادة
الكل ضحك عليا و عيب علي
و انا الوحيدة اللي مشلتش النقد
انا فخورة بالحكاية دي
لاني لأول مرة في حياتي اقرأ حاجة معقدة كدة و محتاجة معرفة واسعة بمدارس الشعر
و محتاجة ثقافة معرفية كبيرة
و فهمتها و جبت درجة كويسة فيها
و زعلانه عشانكم
بس الفترة دي مش عارفة اعمل كدة
معرفش مالي بس بجد
مش عارفة اذاكر
انا بجد محتاجة هدوء
و حد يعمل الاكل
انا زهقت بقي و مش هعمل اكل تاني

انا تعبانة و عاوزة افضفض
و مش عارفة
مش لقياك الان
حسن اخويا قالي حاجة جميلة اوي النهاردة 
و فرجت اوي بيها
قالي ماتضيقيش من اللي بيحصل
انتي في امتحانات و دا ليه الاولوية
حتي لو هترمي الف جنيه في الارض
المهم تنجحي و مش مهم الفلوس
النجاح هو اهم شئ
اتبسطت منه جدا لانه وقف جنبي


انا تعبانة